Бразилын зүүн өмнөд хэсэгт үер бууснаар нас барагсдын тоо 40 хүрээд байна. Нас барагсдыг Лхагва гаригаас оршуулж эхэлжээ. Үүний зэрэгцээ 30 хүн сураггүй алга болж, 3000 гаруй оршин суугч орон гэрээ орхин дүрвээд байна.
Нас барагсдын олонх нь Рио де Жанейрогоос хойд зүгэт 310 орчим км зайд орших Жуис ди Фора хотод амиа алджээ. 560 мянган хүн амтай тус хот үерийн дараа шавраар дүүрээд буй бөгөөд Даваа гаригаас хойш 20 орчим удаагийн хөрсний гулсалт болжээ. Бороо үргэлжлэн орсоор байвал хөрсний гулсалт дахин болох эрсдэлтэй байна. Хотын захиргааны мэдээлснээр 600 орчим айл өрх эрсдэлтэй бүсэд амьдарч байна.
Жуис ди Форагийн зэргэлдээ Уба хот нь 107 мянган хүн амтай. Тэнд ч мөн адил ард иргэдийн амьдрал зогсонги байдалд ороод байна.
Гамшигийн бүсүүдэд аюулгүй байдлын хүчнийхэн байршиж, аврах ажиллагаа гүйцэтгэж эхэлжээ. Мөн уул, толгодтой бүс нутгууд руу эмнэлгийн тусламжийн багийг илгээсэн гэж тус улсын ерөнхийлөгч Луис Лула хэллээ.
Сэтгэгдэл бичих