Эрүү шүүлтээс урьдчилан сэргийлэх үндэсний ажиллагаанаас 2026 оны нэгдүгээр сарын 11-ний өдөр Сонгинохайрхан дүүргийн Цагдаагийн 1-р хэлтэс-ийн алба хаагч Б нь цагдаагийн байрны угтах хэсэгт иргэний биед ноцтой халдан зодож, эрүүдэн шүүсэн байж болзошгүй бичлэгийг олон нийтэд дэлгэлээ. Энэ талаар Эрүү шүүлтээс урьдчилан сэргийлэх асуудал эрхэлсэн гишүүн Я.Цэлмэн өөрийн байр сууриа илэрхийлэв.
Тэрбээр “Цагдаагийн алба хаагч энгийн иргэнийг ‘Чи гэмт хэрэг үйлдсэн’ хэмээн тулган шаардаж, биед нь ноцтой халдаж байгаа нь өөрөө гэмт хэргийн шинжтэй үйлдэл. Иймд уг асуудлыг Цагдаагийн ерөнхий газрын тусгай субьектээр бус, Авлигатай тэмцэх газарт шалгах нь зүйтэй. Төрийн алба хаагч эрх мэдэл, албан тушаалын байдлаа ашиглан иргэний эрх, эрх чөлөөнд халдсан бол хараат бус, бие даасан байгууллагаар шалгуулах нь шударга ёсыг хангах, ашиг сонирхлын зөрчлөөс ангид байх чухал нөхцөл болдог” гэв. Уг асуудалтай холбогдуулан холбогдох байгууллагууд хууль, журмын дагуу шалгалтын ажиллагаа явуулж байгаа бөгөөд хүний эрхийн зөрчил, эрүү шүүлт тулгасан эсэхийг тогтоохоор ажиллаж байна.
Сэтгэгдэл бичих