Энэ оны нэгдүгээр сарын 1-нээс багш нарын цалинг 50 хувиар нэмэгдүүлэхээр төлөвлөсөн ч бодит байдал дээр нэмэгдэл олгогдоогүй талаар эх сурвалжууд мэдээлэв.
Эх сурвалжуудын өгүүлснээр, эдийн засгийн нөхцөл байдалтай холбоотойгоор 2026 оны төсөвт суулгасан багш, ажилчдын цалинг 50 хувиар нэмэгдүүлэхэд шаардлагатай 618.2 тэрбум төгрөг хүрэлцэхгүй болсон тухай чиглэлийг сургуулийн удирдлагуудад албан бус шугамаар өгсөн байна. Мөн Хэмнэлтийн хууль үргэлжилж буйг сануулжээ.
Он гарснаас хойш олгосон багш нарын цалингаас ур чадвар, хоол, унааны нэмэгдлүүдийг хассан нь багш нарын бодит орлогыг нэмэгдүүлээгүй гэж үзэхэд хүргэж байна.
Намар, өвлийн турш 30 гаруй мянган багш хүйтний улиралд суулт зарлаж, тухайн үед Г.Занданшатар тэргүүтэй Засгийн газар 2026 оны нэгдүгээр сараас багш нарын цалинг 2.8 сая төгрөг болгож, 50 хувиар нэмэгдүүлнэ хэмээн мэдэгдсэний дараа суулт зогссон юм. Гэвч бодит байдал дээр уг амлалт хэрэгжээгүй ажээ.
Харин Боловсролын сайд П.Наранбаяр:
“Багш нарын үндсэн цалин 50 хувиар нэмэгдэж байгаа нь бодитой. Хоол, унаа зэрэг зарим нэмэгдэл үндсэн цалинд шингэж байгаа. Тооцооллоор 1,484,000 төгрөг байсан үндсэн цалин 2,226,000 төгрөг болж байна. Нэгдүгээр сарын цалин орохоор бодитоор харагдана”
гэж мэдэгдсэн ч бодит цалин дээрх тайлбартай зөрж, багш нарын дунд дахин бухимдал үүсэж, тэмцлийн хэлбэрт шилжих магадлал нэмэгдсэн талаар эх сурвалжууд мэдээлж байна.
Сэтгэгдэл бичих