Өмнөд Солонгос улсад хүүхэд асрах чөлөө авч буй эцэг эхчүүдийн 30 гаруй хувь нь аавууд байна. Энэ нь өнгөрсөн жилүүдээс хавьгүй өссөн үзүүлэлт гэдгийг өнөөдөр /2026.01.28/ нийтэлсэн тайланд дурджээ.
2025 онд нийт 184,519 эцэг эх хүүхэд асрах чөлөө авсан. Үүнээс 67,196 нь аавууд байсан нь 2024 оноос 60.6 хувиар өссөн үзүүлэлт аж. Түүнчлэн бүх цаг үеийн хамгийн дээд үзүүлэлт болоод байгааг холбогдох яам мэдээлж байна. 2015 онд л гэхэд дөнгөж 4872 аав хүүхэд асрах чөлөө авч байжээ.
Үүний зэрэгцээ заавал аав ээж гэхгүй ерөнхий хүүхэд асрах чөлөөний тоо ч нэмэгдэж, өнгөрсөн оноос 132,695-аар өсчээ.
Өмнөд Солонгос улсад эрчүүд хүүхэд асрах чөлөөг 18 сар хүртэлх хугацаатай авч болдог. Мөн хүүхэд нь дөнгөж төрсний дараа 20 хүртэлх өдрийн цалинтай чөлөө олгодог. Энэ эрхийг Хөдөлмөр эрхлэлтийн тэгш боломж ба ажил-гэр бүлийн тэнцвэрт байдлын тухай хуулиар зохицуулдаг аж. Тус хууль нь эмэгтэйчүүдийг хүүхэд асрах хариуцлагыг ганцаараа нуруун дээрээ үүрэхээс сэргийлэх үүрэгтэй. Засгийн газрын зүгээс бага насны хүүхэдтэй аав ээжүүдэд зориулж ажлын цагийг өглөө 10:00-д эхлүүлэх гэх мэт нэмэлт арга хэмжээг ч танилцуулаад байна. Энэхүү боломжийг ашиглалаа гээд цалинд нь хасалт таналт байхгүй нь давуу тал юм.
Эрчүүдэд хүүхэд асрах чөлөөг олгодог энэ зохицуулалтыг жижиг, дунд компаниуд ч өргөнөөр ашиглах болжээ. Өнгөрсөн онд хүүхэд асрах чөлөө авсан ажилтнуудын 110,903 нь 300 хүрэхгүй ажилтантай компанид ажилладаг байжээ.
Сэтгэгдэл бичих