Анголын нийслэл Луанде хотноо Африкийн холбоо (AU) болон Европын холбоо (EU)-ны 7 дахь дээд хэмжээний уулзалт энэ сарын 24-ний өдөр албан ёсоор эхэллээ. “Үр дүнтэй олон талт бодлогын замаар энх тайван ба цэцэглэлт” сэдвийн хүрээнд зохион байгуулагдаж буй уг уулзалтад хоёр тивийн төр, засгийн тэргүүнүүд, бодлогын түвшний төлөөлөгчид оролцож, хамтын ажиллагааны ирээдүй, геополитикийн шинэ чиг хандлагыг хэлэлцэж байна.
Энэ удаагийн уулзалт нь Африк, Европын холбооны стратегийн түншлэлийг шинэ түвшинд хүргэх зорилготойгоор энх тайван, аюулгүй байдал, худалдаа, хөрөнгө оруулалт, дэд бүтэц, уур амьсгалын өөрчлөлт, дүрвэгсэд болон шилжилт хөдөлгөөний бодлого зэрэг өргөн хүрээний асуудлыг хамарч буйгаараа онцлог юм. Африк тивийн өсөн нэмэгдэж буй эдийн засаг, хүн амын динамик өсөлт, байгалийн баялгийн нөөц, залуу ажиллах хүч нь дэлхийн тогтолцоонд улам бүр чухал байр суурь эзлэх болсон бол Европын холбоо энэхүү бүс нутгийн тогтвортой байдал, эдийн засгийн харилцаанд өндөр ач холбогдол өгдөг.
Шинжээчдийн үзэж буйгаар геополитикийн шинэ нөхцөл байдал, олон талт хамтын ажиллагааны эрэлт өсөж буй энэ үед хоёр тивийн харилцааг бэхжүүлэх нь дэлхийн эдийн засгийн тогтвортой байдалд чухал нөлөө үзүүлэх төлөвтэй байна. Мөн уур амьсгалын өөрчлөлтөөс үүдэлтэй сорилт, бүс нутгийн аюулгүй байдлын эрсдэл, технологи ба эрчим хүчний шилжилт зэрэг асуудлуудыг хамтын ажиллагааны хүрээнд шийдвэрлэх шаардлага нэн тулгамдсан хэвээр байна.
Дээд хэмжээний уулзалт хоёр өдөр үргэлжилж, талууд хамтарсан мэдэгдэл болон бодлогын баримт бичгүүдийг батлах төлөвтэй байна.
эх сурвалж: “The 7th African Union – European Union Summit” – African Union вэбсайт.
Сэтгэгдэл бичих