Нийслэлийн аварга шалгаруулах парламентын мэтгэлцээн энэ амралтын өдрүүдэд буюу арваннэгдүгээр сарын 21-23-нд болно. Энэ удаагийн тэмцээнд Улаанбаатар хотын 14 их, дээд сургуулийн 17 клубын 128 баг оролцож, нийслэлийн хөгжлийн асуудлаар бодлогын шийдэл дэвшүүлэн мэтгэлцэх юм.
Тэмцээнийг Нийслэлийн Засаг дарга бөгөөд Улаанбаатар хотын Захирагчийн нэрэмжит болгон “Шинэ үеийн Улаанбаатарыг хөгжүүлэхэд залуусын оролцоо” сэдвийн дор зохион байгуулж байна.
НЗДТГ-ын Нийгмийн бодлогын газрын дарга Б.Ууганбатын хэлснээр, Улаанбаатар хотын хүн амын 34 орчим хувийг 15-34 насны залуус эзэлдэг. Тиймээс залуучуудын өмнө тулгамдаж буй асуудлыг шийдвэрлэхэд тэдний дуу хоолой, оролцоо чухал гэдгийг онцолжээ.
Нийслэлийн Бодлогын судалгаа, шинжилгээний төвөөс Улаанбаатар хотыг хөгжүүлэхэд чиглэсэн 60 гаруй шийдэл боловсруулснаас 25-ыг нь сонгон оюутнуудын мэтгэлцээний сэдэв болгожээ. Тэмцээний үеэр дэвшүүлсэн санал, санаачилгыг хотын удирдлагууд хүлээн авч, хөгжлийн төсөл, төлөвлөгөөндөө тусгах боломжтой гэдгээрээ онцлог юм.
Монголын Мэтгэлцээний нэгдсэн танхимын тэргүүн Б.Мягмаржаргалын мэдээлснээр, тэмцээнд 14 сургуулийн 17 клубын 250 гаруй оюутан бүртгүүлжээ. Бодлогын мэтгэлцээн нь шийдвэр гаргах түвшинд асуудлыг судалгаа, баримтад тулгуурлан хэлэлцэж, шийдэл боловсруулахад чиглэдэг байна.
Хэсгийн тоглолтууд арваннэгдүгээр сарын 21-22-нд, шигшээ тоглолтууд 23-нд Монгол Улсын Их Сургууль болон нийслэлийн нутгийн захиргааны Хангарди цогцолборт үргэлжилнэ.
Эх сурвалж: НЗДТГ-ын Хэвлэл мэдээлэл, олон нийттэй харилцах хэлтэс












Сэтгэгдэл бичих