Орос-Украины зэвсэгт мөргөлдөөн хоёр дахь жилдээ үргэлжилж буй энэ үед АНУ болон Украин хоёр Женева хотноо хийсэн хэлэлцээний дараа “шинэчлэн боловсруулсан энхийн зохицуулалтын хүрээ” боловсруулах ажил урагшилж буйгаа мэдэгдлээ. Энэ нь өмнө нь санал болгогдсон 28 цэг бүхий энхийн төлөвлөгөөг дахин нарийвчлан засварлаж, талуудын байр суурийг ойртуулах зорилготой шинэ шат юм.
Reuters-ийн мэдээлснээр, АНУ-ын анхны санал Европын холбоотнууд болон Украин талын зүгээс “Оросын хүсэлд дэндүү ойр” гэж шүүмжлэгдсэн тул Киев өөрийн аюулгүй байдлын баталгаа, нутаг дэвсгэрийн бүрэн бүтэн байдлыг илүү тодорхой тусгах шаардлагатай гэж үзэн засвар хүссэн байна. Тиймээс одоо боловсруулж буй шинэ хүрээ нь хэрхэн гал зогсоох, энхийн тогтвортой механизм бий болгох, мөн дайны дараах сэргээн босголтыг хэн, хэрхэн санхүүжүүлэх зэрэг хамгийн төвөгтэй асуудлуудыг хамарч байгаа аж.
Женевийн уулзалтыг хоёр тал “үр дүнтэй” гэж дүгнэсэн ч бодит шийдвэрүүд хараахан гараагүй байна. Тухайлбал, Украины батлан хамгаалах чадварыг бууруулах эсэх, аюулгүй байдлын баталгаа ямар хэлбэртэй байх, дахин нөхөн сэргээх хөрөнгө оруулалтыг олон улсын байгууллагууд хэрхэн хариуцах зэрэг асуудлууд нээлттэй хэвээр.
Харин Кремлийн зүгээс энэхүү шинэчлэгдэж буй энхийн хүрээний талаар албан ёсоор мэдээлэл аваагүй, тиймээс “шеад хариу өгөх боломжгүй” гэдгийг мэдэгдсэн байна.
Энэхүү хэлэлцээ дэлхийн улс төрийн тэнцвэрт байдал, Европын аюулгүй байдалд ихээхэн нөлөөтэй бөгөөд олон улсын олон талт дипломат ажиллагаанд шинэ чиглэл үүсгэх магадлалтай хэмээн шинжээчид үзэж байна.
эх сурвалж:“US, Ukraine work on ‘refined’ peace plan to end war with Russia” – Reuters.
Сэтгэгдэл бичих