Олон улсын тээврийн жолооч 21 хоногийн тусгаарлалтаас гарсны дахин халдвар илэрсэн тул хариу арга хэмжээ авч, Улаанбаатар хотод гурав хоног хөл хорио тогтоохоор Улсын онцгой комиссоос шийдвэрлэлээ.
Арваннэгдүгээр сарын 8-ны өдөр буюу өнөөдрөөс дөрөв хоногийн өмнө тухайн жолооч тусгаарлалтаас гарсан байна.
Гурав хоногийн хугацаанд тандалт судалгаа хийх, хавьтлуудыг тодорхойлох юм. Хөл хорионы хугацаанд
- Хотоос гарах хөдөлгөөнийг хязгаарлах
- Үзвэр үйлчилгээ, баар цэнгээний газрын үйл ажиллагааг
- Боловсролын бүх шатны байгууллагын үйл ажиллагааг хаахаар боллоо.
Мөн нийтийн тээвэрт зохицуулалт хийж, нийтийн тээвэр өглөө 06.00-10.00, орой 17.00-21.00 цагийн хооронд буюу ажил ирэх, тарах үед иргэдэд үйлчилнэ. Иргэдийн айж сандрах, тэвдэх хэрэггүй бөгөөд шаардлагагүй бол гэрээсээ гарахгүй байхыг Шадар сайд зөвлөлөө.
ХАЛУУРАХ, ХАНИАЛГАХ ШИНЖ ТЭМДЭГ ИЛЭРВЭЛ 119 ДУГААРТ ХОЛБОГДОНО
Эрүүл мэндийн сайд Т.Мөнхсайхан Алтанбулаг боомтоор ирсэн жолооч 21 хоногийн тусгаарлалтаас гарснаас 4 хоногийн дараа шинжилгээ авахад жолооч болон түүний эхнэрээс халдвар илэрсэн тул тэднийг ХӨСҮТ-д тусгаарласан. Мөн ойрын хавьталд орсон хүмүүсээс шинжилгээ авч байна. Тандалт судалгаа 2-3 хоног үргэлжлэхээр байна. Иргэд амны хаалтаа зүүж, зайгаа барьж, гараа ариутагах зэрэг халдвар хамгааллын дэглэмээ маш сайн барихыг зөвлөж байна. Эрүүл мэндийн салбар бэлэн байдлаа хангасан. Халуурах, ханиалгах шинж тэмдэг илэрвэл 119 дугаарт холбогдон хэрхэн хаана хандахаа тодорхой болгож байж, эрүүл мэндийн байгууллагад хандахыг зөвлөж байна.
НЭГДҮГЭЭР ХАВЬТЛЫН 16 ИРГЭНИЙГ ТОГТООЖ, ШИНЖИЛГЭЭ АВЧ БАЙНА
Цагдаагийн ерөнхий газрын дэд дарга, цагдаагийн хурандаа Ж.Амгалан Үүссэн нөхцөлтэй холбогдуулан Улаанбаатар хотоос гарах хөдөлгөөнийг 2020 оны 11 сарын 11-ний 01:30 цагаас эхлэн хааж байгаа бөгөөд 3 хоног Улаанбаатар хот уруу орох хөдөлгөөн нээлттэй. Энэ хугацаанд Улаанбаатар хотоос аймгууд уруу хүнс, буяны ажил, шатахуун түгээх зэрэг хөдөлгөөнд нээлттэй. Нэгдүгээр хавьтлын 16 иргэнийг тогтоож, эхний хүмүүс шинжилгээнд орж байна. Халдварт өвчин тархсан гэж ойлгож болохгүй. Тухайн халдвартай иргэний явсан маршрутыг тогтоож байна.
Сэтгэгдэл бичих