Монгол Улс, Холбооны Бүгд Найрамдах Герман Улс (ХБНГУ)-ын Засгийн газар хоорондын Хөгжлийн бодлогын хамтын ажиллагааны ээлжит хэлэлцээ Улаанбаатар хотноо амжилттай зохион байгууллаа.
Хэлэлцээг Монгол талаас Эдийн засаг, хөгжлийн яамны Төрийн нарийн бичгийн дарга И.Батхүү, Герман талаас Монгол Улсад суугаа Онц бөгөөд Бүрэн эрхт Элчин сайд Хэльмут Рудольф Кулитц, Холбооны Эдийн засгийн хамтын ажиллагаа, хөгжлийн яамны Зүүн, Төв Азийн хэлтсийн дарга Яннис Неопиту нар тэргүүлэв.
Монгол талаас Эдийн засаг, хөгжлийн яам, Гадаад харилцааны яам, Хууль зүй, дотоод хэргийн яам, Сангийн яам, Боловсролын яам, Байгаль орчин, уур амьсгалын өөрчлөлтийн яамны нийт 17 төлөөлөл, Германы талаас Холбооны Эдийн засгийн хамтын ажиллагаа, хөгжлийн яам (BMZ) Германы олон улсын хамтын ажиллагааны нийгэмлэг (GIZ), Сэргээн босголтын зээлийн банк (KfW), Геошинжлэх ухаан, байгалийн нөөцийн холбооны хүрээлэн (BGR)-ийн нийт 14 төлөөлөл оролцлоо.
Хэлэлцээний онцлог нь Монгол Улс, ХБНГУ стратегийн түншлэлийн түвшинд хүрсэнтэй холбоотойгоор хөгжлийн хамтын ажиллагааг шинэ шатанд гаргах талаар талууд санал нэгдсэн явдал байв.
Энэ хүрээнд ХБНГУ-ын Засгийн газар Монгол Улсын Засгийн газрын шинэчлэлийн зорилтуудыг дэмжих, уламжлалт хамтын ажиллагааны чиглэлүүд болох биологийн олон янз байдал ба байгаль хамгаалал, боловсрол ба хөдөлмөр эрхлэлт, уур амьсгал ба эрчим хүчний салбарт нийт 43.1 сая еврогийн санхүүжилт олгохоор болов.
Герман Улсын Засгийн газар Монгол Улсын эдийн засгийг төрөлжүүлэх бодлогыг эрчимжүүлэхэд дэмжлэг үзүүлж, Засгийн газрын урт болон дунд хугацааны хөгжлийн бодлогын хөтөлбөрт тусгагдсан арга хэмжээг амжилттай хэрэгжүүлэх, хөрөнгө оруулалт, бизнесийн таатай орчныг бүрдүүлэхэд тууштай хамтран ажиллахаа илэрхийлэв.
Цаашид Германы Засгийн газрын санхүүжилтийн шинэ арга хэрэгсэл, хөрөнгө оруулалтын механизмыг Монгол Улсад нэмэгдүүлэх, хоёр талын бизнес, хувийн хэвшил хоорондын хамтын ажиллагааг өргөжүүлэхэд анхаарч ажиллахаар тохиролцлоо.
Discussion about this post