Улсын хэмжээнд он гарснаас хойш өнөөдрийн байдлаар 87 удаагийн усны осол гарч, 99 хүн амь насаа алджээ. Үүний 76 нь том хүн, 23 нь хүүхэд байна. Оны эхний долоон сарын байдлаар 86 хүн усанд осолдож амь насаа алдаад байлаа. Өөрөөр хэлбэл, наймдугаар сарын эхний 10 хоногт 13 хүн усанд осолдож амь насаа алджээ.
Гол, усны осол нь ихэвчлэн иргэдийн анхаарал болгоомжгүй байдал, бага насны хүүхдийг хараа хяналтгүй орхисноос, эцэг, эхчүүдийн сонор сэрэмжгүй байдлаас, согтууруулах ундаа хэрэглэсэн үедээ гол усанд орох зэрэг шалтгаанаас үүдэлтэй байдаг байна. Тиймээс дараах зүйлсийг Онцгой байдлын ерөнхий газраас анхааруулж байна.
- Мэргэжлийн байгууллагаас өгч байгаа заавар, зөвлөмжийг дагах,
- Гол, мөрөн нуурын ойролцоо амарч зугаалахдаа сонор, сэрэмжтэй байх,
- Гэр бүл найз нөхөд, хамт олноороо амралт зугаалгаар явахдаа нэгдсэн зохион байгуулалттай, нэгнийгээ бүртгэдэг байх,
- Хүүхдийг гол усны эрэг дагуу явуулж, тоглуулахгүй байх, хүүхдэд тавих хараа, хяналтаа сайжруулах,
- Согтууруулах ундаа хэрэглэсэн үедээ гол усанд орохгүй байх,
- Баталгаатай гүүр, гарам, гарцтай газраар автомашинтай зорчиж гол, усны ослоос урьдчилан сэргийлэх.
Сэтгэгдэл бичих