Орон нутгийн замд үйлдэгддэг зам тээврийн осол хэргийн талаар Тээврийн цагдаагийн албанаас мэдээлэл хийлээ.
Өнгөрсөн онд зам тээврийн осолд 5323 хүн өртөж, 560 гаруй иргэн амь насаа алдсан байна. Осол хэргийн 74 хувь орон нутагт үйлдэгджээ. Үүний 75 хувь нь буруу буюу баруун талдаа жолооны хүрдтэй, 81 хувь нь 10-аас дээш жилийн насжилттай тээврийн хэрэгслээр замын хөдөлгөөнд оролцсонтой холбоотой аж.
Иймд орон нутгийн авто замд үйлдэгддэг зам тээврийн ослыг бууруулах, урьдчилан сэргийлэх, хөдөлгөөнд оролцогчдын сахилга, хариуцлагыг дээшлүүлэх зорилгоор “Орон нутгийн замын хөдөлгөөний соёл-2019” урьдчилсан сэргийлэх арга хэмжээг зургадугаар сарын 15-наас есдүгээр сарын 25 хүртэл зохион байгуулахаар болсон байна.
Сүүлийн үед орон нутгийн замд, тэр дундаа Төв, Баян-Өлгий, Баянхонгор аймаг руу явах чиглэлд зам тээврийн осол хамгийн их өссөн аж. Үүнтэй холбоотойгоор зам тээврийн осол хамгийн ихээр үйлдэгддэг цэгүүдээс 16 байршилд осол хэрэг арилгах арга хэмжээ авч, 34 цэгт тэмдэг тэмдэглэгээ тавьж, хурд хэмжигчийг иргэдийн төсөөлөлд тохируулан ажлуулж байгаа юм байна. Өөрөөр хэлбэл, иргэдийн мэдэх тогтсон цэгт хурд хэмжигч ажиллахгүй, орон нутгийн аль ч замд хурд хэмжигч ажиллах аж. Харин хурд хэтрүүлсэн тохиолдолд хэдэн км цагийн хурд хэтрүүлснээс хамааран торгох, жолоодох эрхийг хасах юм байна.
Иймд хөдөө орон нутгийн замд хөдөлгөөнд оролцохдоо замын хөдөлгөөний дүрмээ баримтлан, соёлтой хөдөлгөөнд оролцохыг Тээврийн цагдаагийн байгууллагаас сэрэмжлүүллээ.
Үүнээс гадна жолоочийн соёл, хандлага, ухамсарыг өөрчлөх зорилгоор “Яараад яахав дээ” аяныг энэ сарын 15-наас долдугаар сарын 15 хүртэл зохион байгуулахаар болжээ. Аяны хүрээнд зам тээврийн осол хэрэг хамгийн ихээр үйлдэгддэг орон нутгийн чиглэлд мэдээллийн самбар, гэрэлтүүлэг тавьж, нөлөөллийн арга хэмжээг зохион байгуулахаар төлөвлөсөн байна.
Сэтгэгдэл бичих