Зэвсэгт хүчний нэгэн ангид хугацаат цэргийн алба хаагчид хоорондоо захирагдахгүй харилцааны зөрчил гаргаж, улмаар нэг цэрэг бэртсэн хэрэг гарчээ. Олон нийтийн сүлжээнд “цэрэг зодуулж, ухаангүй эмнэлэгт хүргэгдсэн” гэх мэдээлэл тархсантай холбогдуулан холбогдох албаныхан тайлбар өглөө.
Зэвсэгт хүчний Барилга, инженерийн цэргийн штабын дарга, хурандаа Б.Дорждэрэм-ийн мэдээлснээр, гуравдугаар сарын 22-ны 17:00 цагийн орчимд Баянхонгор аймагт байрлах Барилга, инженерийн харьяа ангид хоёр хугацаат цэрэг хоорондоо маргалдаж, зөрчил үүсгэсний улмаас нэг нь бэртсэн байна.
Тэрбээр, “Маргалдсан хоёр алба хаагч нэг нутгийн, дотно харилцаатай байсан. Үйл явдлын дараа 10 минутын дотор аймгийн нэгдсэн эмнэлэгт хүргэж, анхны тусламж үзүүлсэн. Улмаар гуравдугаар сарын 23-ны шөнө Цэргийн төв эмнэлэгт шилжүүлж, нүүрний шарханд косметик оёдол хийсэн. Алба хаагчийн биеийн байдал хэвийн, ухаан алдаж, орж гарсан зүйл байхгүй” гэв.
Мөн уг хэрэгт цагдаагийн байгууллагаас хэрэг бүртгэл нээн шалгаж эхэлсэн байна.
Зэвсэгт хүчний хяналт, шинжилгээ, үнэлгээний газрын дарга, бригадын генерал С.Баяр-Очир “Энэ хэрэг нь зөвхөн хоёр хугацаат цэргийн хооронд үүссэн зөрчил бөгөөд өөр оролцсон хүн байхгүй. Зэвсэгт хүчний жанжин штабаас ажлын хэсэг газар дээр нь ажилласан. Хуулийн байгууллагын дүгнэлт гарсны дараа холбогдох албан тушаалтнуудад хариуцлага тооцно” хэмээн мэдэгдлээ.
Албаныхны өгсөн мэдээллээр, олон нийтийн сүлжээнд тархсан “ухаангүй, хүнд байдалтай” гэх мэдээлэл нь бодит нөхцөл байдлаас зөрүүтэй байгаа аж. Хэргийг үргэлжлүүлэн шалгаж байна.
Сэтгэгдэл бичих