“Эрдэнэс Тавантолгой” ХК 2025 оны үйл ажиллагааны тайлангаа танилцуулж, тухайн жилийн ашгаас хувьцаа эзэмшигчдэд олгох ногдол ашгийн талаар мэдээлэл өглөө.
Компанийн гүйцэтгэх захирлын үүрэг гүйцэтгэгч Н.Цэрэнсамбуугийн мэдээлснээр, Компанийн тухай хуульд заасны дагуу санхүүгийн жил дууссанаас хойш 50 хоногийн дотор Төлөөлөн удирдах зөвлөл ногдол ашиг хуваарилах шийдвэр гаргадаг бөгөөд 2025 оны ашгаас нэгж хувьцаанд 65.55 төгрөгийн ногдол ашиг олгохоор шийдвэрлэжээ.
2025 онд “Эрдэнэс Тавантолгой” ХК 1.1 их наяд төгрөгийн цэвэр ашигтай ажилласан бөгөөд үүнээс нийт 786.6 тэрбум төгрөгийг ногдол ашигт хуваарилахаар болсон байна. Үүнээс Монгол Улсын 3.5 сая хувьцаа эзэмшигч иргэдэд нийт 208.5 тэрбум төгрөгийн ногдол ашиг олгох юм.
Ингэснээр 1072 ширхэг хувьцаатай нэг иргэн татвар суутгасны дараах дүнгээр 63,242 төгрөгийн ногдол ашиг авах бөгөөд уг мөнгийг 2026 оны дөрөвдүгээр сарын 30-ны дотор олгохоор төлөвлөснийг компанийн албан ёсны цахим хуудсанд мэдээлжээ.
Тус компани байгуулагдсанаас хойш нийт 10.3 их наяд төгрөгийн ногдол ашиг тараах шийдвэр гаргасан бөгөөд үүнээс 2.6 их наяд төгрөгийг иргэдэд бодитоор олгоод байгаа юм.
2025 оны ногдол ашгийн шийдвэр нь “Эрдэнэс Тавантолгой” ХК-ийн ашигт ажиллагаа тогтвортой байгааг илтгэж байгаа бөгөөд иргэдийн эзэмшиж буй хувьцааны өгөөжийг нэмэгдүүлэхэд чиглэсэн арга хэмжээ гэж үзэж байна.
Эх сурвалж: “Эрдэнэс Тавантолгой” ХК-ийн албан ёсны мэдээлэл.
Сэтгэгдэл бичих