БНХАУ Шаньдун мужийн Циндао хотноо зохион байгуулагдсан бүс нутгийн эдийн засгийн форумын үеэр АСЕАН-тай хамтын ажиллагааны “Дижитал худалдааны шинэ зам” нэртэй стратегийн хөтөлбөрөө танилцууллаа. Уг хөтөлбөр нь цахим худалдааны нэгдсэн стандарт, хил дамнасан төлбөр тооцооны автоматжуулалт, ложистикийн дижитал сүлжээг шинэчлэх зэрэг гол чиглэлд төвлөрч, Ази–Номхон далайн худалдааны бүтцийг эрс өөрчлөх чухал алхам гэж шинжээчид үзэж байна.
Хятадын Худалдааны яамны мэдээлснээр, энэхүү шинэ загвар нь бүс нутгийн компаниудад илүү хурдан, найдвартай гүйлгээ хийх боломж бүрдүүлж, цахим худалдааны хилийн саад бэрхшээлийг багасгах зорилготой. Хөтөлбөр хэрэгжсэнээр АСЕАН–Хятадын худалдааны эргэлт ойрын жилүүдэд 30 хүртэл хувиар өсөх тооцоо гарчээ.
Форумын үеэр танилцуулсан техникийн шийдлүүдийн дотор:
-
Нэгдсэн цахим төлбөр тооцооны платформ,
-
Бүтээгдэхүүний гарал үүслийн дижитал гэрчилгээ,
-
Ухаалаг боомт, ложистикийн автомат удирдлага,
-
Хиймэл оюун ухаанд суурилсан худалдааны эрсдэлийн хяналтын систем
орж байгаа бөгөөд эдгээр нь экспорт, импортын үйл явцын хугацааг 40–60 хувиар богиносгоно гэж үзэж байна.
АСЕАН-ы зарим гишүүн орнууд, тухайлбал Сингапур, Малайз, Тайланд дижитал худалдааны орчинд хурдтай шинэчлэл хийж буй учир шинэ загвар бүс нутгийн компаниудын өрсөлдөх чадварыг нэмэгдүүлнэ гэж форумын оролцогчид онцолжээ. Харин Хятадын хувьд экспортын бүтэц олон улсын зах зээлийн дарамтад орж буй энэ үед бүс нутгийн дижитал интеграци нь стратегийн ач холбогдолтой алхам боллоо.
Эдийн засагчдын дүгнэснээр, АСЕАН–Хятадын дижитал худалдааны шинэчлэл нь бүс нутгийн нийлүүлэлтийн сүлжээг илүү тогтвортой болгож, жижиг, дунд бизнесүүдийн олон улсын зах зээлд нэвтрэх боломжийг өргөжүүлэх давуу талтай. Гэвч мэдээллийн аюулгүй байдал, кибер хамгаалалт, стандартын нэгдмэл байдал зэрэг сорилтууд үлдэж байгаа тул талууд эдгээр асуудлыг шат дараатай шийдэх шаардлагатай гэж дурджээ.
Эх сурвалж:Xinhua News Agency
Сэтгэгдэл бичих