Эс энд Пи /S&P/ зээлжих зэрэглэл тогтоогч агентлагаас Монгол Улсын 2025 оны зээлжих зэрэглэлийг “ВB-, Тогтвортой” болгон сайжруулснаа 2025.10.30-ны өдөр мэдэгдлээ.
Монгол Улсын зээлжих зэрэглэлийн үнэлгээг “ВВ-, Тогтвортой” болгон сайжруулахад дараах хүчин зүйлс голлон нөлөөлсөн байна.
Монгол Улсын төсвийн гүйцэтгэл нь 2022 оноос хойш уул уурхайн бүтээгдэхүүний экспортын өсөлтөд тулгуурлан мэдэгдэхүйц сайжирсан.
Эдийн засгийн тогтвортой өсөлт болон Засгийн газрын өрийн оновчтой удирдлага нь өрийн ДНБ-д эзлэх харьцааг бууруулахад хувь нэмэр оруулсан.
Дунд хугацаанд Монгол Улсын эдийн засаг тогтвортой өсөж, төсвийн алдагдал ирэх 1–2 жилд харьцангуй бага түвшинд хадгалагдана гэж үзэж байна.
Мөн сүүлийн үеийн дотоодын улс төрийн нөхцөл байдлаас үл хамааран бодлогын хэрэгжилт тогтвортой үргэлжилнэ гэж харж байна.
Ийнхүү Монгол Улсын Засгийн газар 2025 онд олон улсын зээлжих зэрэглэл тогтоогч гурван агентлагийн үнэлгээнд дараах ахиц гаргалаа.
Фитч (Fitch Ratings) агентлаг Монгол Улсын зээлжих зэрэглэлийг “B+, Тогтвортой” төлөвт хэвээр хадгалсан бол, Мүүдис (Moody’s Investors Service) агентлагийн үнэлгээ нэг шат ахиж “B2, Тогтвортой”-оос “B1, Тогтвортой” болж сайжирсан байна. Мөн Эс энд Пи (S&P Global Ratings) агентлаг Монгол Улсын зээлжих зэрэглэлийг хоёр жил дараалан ахиулж, өмнөх “B+, Эерэг” үнэлгээг “BB-, Тогтвортой” болгон сайжрууллаа.
Монгол Улсын зээлжих зэрэглэл ийнхүү “BB-” түвшинд хүрсэн нь сүүлийн 13 жилийн дараа анх удаа өмнөх өндөр түвшиндээ буцаж хүрсэн үзүүлэлт юм. Үүний үр дүнд Монгол Улс “өрийн эрсдэл өндөртэй” ангиллаас гарч, “хөрөнгө оруулалтын тодорхой хэмжээний эрсдэлтэй” буюу илүү найдвартай ангилалд багтах болсон байна.
Зээлжих зэрэглэл сайжирснаар Монгол Улсын гадаад санхүүжилтийн өртөг, зээлийн хүүгийн түвшин буурах төдийгүй, банк, санхүүгийн байгууллагууд болон хувийн хэвшлийн компаниудын зээлжих чадвар сайжирч, үүний улмаар гадаадын хөрөнгө оруулагчдын Монгол Улсад итгэх итгэл улам нэмэгдэх чухал ач холбогдолтой алхам боллоо.
Сэтгэгдэл бичих