Монгол Улсын Засгийн газар, Эдийн засаг, хөгжлийн яамнаас Хөгжлийн бодлого, төлөвлөлт, түүний удирдлагын тухай хуульд заасны дагуу “Монгол Улсыг 2026-2030 онд хөгжүүлэх таван жилийн үндсэн чиглэл”-ийн төслийг боловсруулан 10 дугаар сарын 15-ны өдөр Засгийн газрын хуралдаанаар хэлэлцүүлэхээр бэлтгэл ажлыг хангаж байна.
Уг төлөвлөлтийн баримт бичгийг судалгаа, шинжилгээнд тулгуурлан, зорилго, зорилт нь хэмжигдэхүйц, шалгуур үзүүлэлт нь зорилгодоо нийцсэн, төлөвлөлт нь үр дүнд чиглэсэн байдлаар бүх талын оролцоог хангаж боловсруулалтыг хийж байна.
Төлөвлөлтийн баримт бичгийг эрдэм шинжилгээний байгууллага, их, дээд сургууль, төрийн захиргааны төв байгууллага, мэргэжлийн холбоод, хувийн хэвшлийн хуулийн этгээдийг оролцуулан нийт 14 удаагийн олон нийтийн хэлэлцүүлгийг зохион байгуулж, ирүүлсэн бүх саналуудыг нэгтгэн уялдааг хангаж тусгалаа.
“Монгол Улсыг 2026-2030 онд хөгжүүлэх таван жилийн үндсэн чиглэл” нь
1. Хүний хөгжил,
2. Нийгмийн хөгжил,
3. Эдийн засаг, дэд бүтцийн хөгжил,
4. Байгаль орчин, ногоон эдийн засаг,
5. Зөв засаглал, дижитал шилжилт,
6. Бүсийн хөгжил,
7. Үндэсний өрсөлдөх чадвар,
8. Шинжлэх ухаан, технологи, хиймэл оюун гэсэн бодлогын 8 үндсэн чиглэлээс бүрдэнэ.
Энэ хүрээнд Үндэсний 10 үр дүн, Салбарын 34 үр дүн, Төсвийн ерөнхийлөн захирагчийн 79 үр дүн, Хөтөлбөрийн 170 үр дүнг тодорхойлоод байна.
Мөн уг төлөвлөлтийн баримт бичгийн шалгуур үзүүлэлтүүдийг Тогтвортой хөгжлийн зорилттой уялдуулж олон улсад хүлээсэн манай улсын үүрэг амлалтыг биелүүлж, нөгөө талаас уг баримт бичгийн боловсруулалтын чанарыг сайжруулж байна.
Сэтгэгдэл бичих