ОХУ-ын нийслэл Москва хоттой ойр оршдог Красногорск хотын Крокус Сити Холлд халдлага гарч, 139 хүн амиа алдаад буй. Концертын танхимд алан хядах ажиллагаа зохион байгуулсан этгээдүүдийг баривчилж, Тажикистан гаралтай Афган дахь Исламын улс бүлэглэлийн гишүүд байсныг нь тогтоожээ. Хэдий халдлага гарснаас хойш Исламын улс бүлэглэл удаа дараа буруугаа хүлээгээд байгаа ч ОХУ-ын эрх баригчид Украин оролцсон байж болзошгүй талаар мэдэгдээд байна.
Крокус Сити Холлд болсон халдлагын дараа ОХУ-ын Үндэсний аюулгүй байдлын зөвлөлийн орлогч дарга Дмитрий Медведев “Хэрэв энэ халдлагыг Украин үйлдсэн нь тогтоогдвол бүгдийг нь алан хядагч гэж үзэн хариу арга хэмжээ авах болно” гэдгээ мэдэгдсэн. Үүнтэй холбоотойгоор Украины Ерөнхийлөгчийн Тамгын газраас албан ёсны хариу өгч, ямар нэгэн холбоогүй гэдгээ мэдэгдсэн ч ОХУ-ын төрийн тэргүүн Украин оролцсон гэж хардаж байгаа талаар мэдээлжээ. ОХУ-ын Ерөнхийлөгч Владимир Путин хийсэн мэдэгдэлдээ “Халдлагыг радикал исламистууд үйлдсэн гэдгийг мэдэж байгаа. Гэхдээ хэн захиалсан байж болох вэ. Тэднийг тэнд хэн хүлээж байсан бэ” гэсэн утгатай зүйл хэлж, алан хядах ажиллагаанд Украин ямар нэгэн байдлаар оролцсон байж болзошгүй гэж мэдэгдсэн байна. Алан хядах ажиллагаа зохион байгуулсан Исламын улс бүлэглэлийн гишүүдийг Украины хилээс 100 км зайд оршдог Брянск мужаас баривчилсан байдаг.
Сэтгэгдэл бичих