Шведийн алдарт хөл бөмбөгч Златан Ибрагимович болон Английн алдарт Дэвид Бекхэм нар өнөөдөр Самара аренад болох Швед-Английн шөвгийн наймын тэмцээнээр хөгжилтэй мөрий тавьжээ.
Ибрагимович Твиттертээ “Дэвид Бекхэм, хэрвээ өнөөдөр Англи Шведийг ялбал дэлхийн хүссэн газарт чинь чамайг хоолонд даая. Харин Швед ялбал чи ИКЕА дэлгүүрээс миний хүссэн юмыг авч өгөөрэй, за юу?” хэмээн Ибрагимович Дэвид Бекхэмд хандаж бичжээ.
Хариуд нь Бекхэм “Хэрвээ Швед ялах юм бол би чамайг ИКЕА руу дагуулж ороод Лос Анжелес дахь шинэ байшинд чинь хүссэн бүхнийг чинь авч өгье. Харин Англи ялбал Уэмбли цэнгэлдэх хүрээлэнд болох тэмцээнд чи Английн шигшээгийн цамцтай ирж, завсарлагаанаар нь загас чипс иднэ шүү” гэжээ.
Ибрагимович, Бекхэм хоёр одоогоор АНУ-д амьдарч байгаа бөгөөд Бекхэм Майамид хөл бөмбөгийн баг бүрдүүлэхээр ажиллаж байгаа бол Ибрагимович “Лос Анжелес Галакси” багт тоглож байгаа аж. Өмнө нь тэд хамтдаа Францын Пари Сен-Жермен клубт тоглож байсан билээ.
Швед-Английн тэмцээн өнөөдөр Улаанбаатарын цагаар 22:00 цагт эхэлнэ. Түүний дараа 02:00 цагаас Орос-Хорватын багууд өрсөлдөх юм.
Сэтгэгдэл бичих