Монгол хүн сансарт ниссэний 40 жилийн ойн хүрээнд ‘Сансар-40 жил’ дурсгалын зоос гаргажээ

Монгол хүн сансарт ниссэний 40 жилийн ойг тохиолдуулан Монголбанкны Эрдэнэсийн сангаас Сансар-40 жил дурсгалын зоос гаргажээ.

Сансар-40 жил зоосонд сансрын уудам байдлыг ‘obsidian black’ технологи ашиглан хар өнгөөр харуулж, сар болон дэлхийг өнгөтөөр дүрсэлсэн. Мөн “Союз-39” хөлгөөр ‘Салют-6’ сансрын станцтай холбогдсон байгаагаар дүрсэлж, БНМАУ-ЗХУ-ын хамтарсан сансрын нислэгийн Монгол талын логог дүрсэлжээ. Түүнчлэн Монгол Улсын говь, цөл нутагт Марс гаригтай хамгийн төстэй орчин, нөхцөл бүрдүүлэн, туршилт, хөгжүүлэлтийн бааз байгуулан, хүний нөөц чадварыг хөгжүүлэхээр ажиллаж буй ‘MARS-V’ төслийг таниулан сурталчлах үүднээс дэлхийн бөмбөрцөг дээр тус төслийн логог дүрсэлжээ.

Монголбанкны Ерөнхийлөгч Б.Лхагвасүрэн Монгол Улсын баатар, Чингис хаан одонт, хошууч генерал Ж.Гүррагчаа, Одон орон, геофизикийн хүрээлэнгийн захирал, академич С.Дэмбэрэл нарыг өнөөдөр хүлээн авч уулзахдаа уг дурсгалын зоосны дээжийг гардуулсан юм.