Хүүхэд бүрийн шимтэн үзэх дуртай хүүхэлдэйн киноны нэг бол яалтачгүй Ну погоди хүүхэлдэйн кино байсан. Зөвлөлтийн үеийн алдартай хүүхэлдэйн кино болох ‘Ну погоды!’ цувралын гол дүр чоно, туулай хоёрын дүрийг өөрчлөн шинэчилсэн хувилбараа “Союзмультфильм” танилцууллаа.
‘Ну погоды’ цувралын шинэ ангийг энэ өвөл гаргана хэмээн ‘Союзмультфильм’ студи өмнө нь мэдээлсэн юм. Туулайн дүрд Оросын шоумен Дмитрий Хрусталев, чононы дүрд Гарик Харламов нар дуу оруулжээ.
‘Зөвлөлтийн үед 30 гаруй анги бүтээгдсэн энэ цувралын орчин цагийн шинэ дүрийг бий болгох талаар бид удаан эрэл хийлээ. Хуучин шинэ хоёр дүрийн тэнцвэрийг барих, өмнөх дүрийн онцлог шинжүүдийг үлдээх шаардлагатай байсан. Жишээ нь, шинэ туулайны нүдний өнгө хуучин туулайтай адилхан байгаа’ хэмээн ‘Союзмультфильм’ студийн ерөнхий продюсер Юлия Осетинская хэллээ.
Харин ‘Союзмультфильм’ студийн захирал Борис Машковцев цувралын шинэ дүрүүд илүү зөөлөн аястай болсныг хэлсэн байна. Мөн одоогийн байдлаар 52 анги гаргахаар төлөвлөж байгаа бөгөөд хүүхэлдэйн киноны зорилтот үзэгчидийг зургаагаас найман настай хүүхдүүд гэж үзжээ.
Тус хүүхэлдэйн киног 3D форматаар тоглох бол цувралд шинэ туслах дүрүүд болох Тим дорго, Шу зараа, Улья бор гөрөөс тоглох гэнэ. Энэ гурван дүр нь алдартай уулын амралтын газар ‘Роза Хутор’ хэмээх уулын бэлгэ тэмдэг болох юм.
Сэтгэгдэл бичих