Жил бүр Их Британид ургацын баяраа тэмдэглэхдээ хамгийн амттай, гүйцэт боловсорсон, хамгийн том жижиг, эсвэл этгээд хэлбэртэй алим шалгаруулж, хэрхэн зөв тариалах аргачлал, алимны шүүс ундаа хийх арга, алим жимсний талаарх мэдлэгээ хоорондоо солилцож, дээшлүүлдэг өдрийг 10 сарын 21-нд тэмдэглэдэг байна.
Энэ өдрийг 1990 онд Common Ground гэх группээс санаачилж, тухайн орон нутагтаа тэмдэглэдэг байсан нь аажимдаа улс даяар тэмдэглэдэг өдөр болжээ.
‘Өдөрт нэг алим иддэг бол эмч хэрэггүй’ гэдэг үг байдаг. Үнэхээр өдөрт 1-г идвэл өвчнөөс холуур өнгөрдөг гэнэ. Алим Витамин С, А, фосфор, төмөр, кальциар баялаг. Сарнайн төрлийн ургамалд багтдаг, жимсний 25% нь агаар, 5% нь уураг, алимны мод 100 жил ургах чадвартай байдаг аж.
Алимны сайн талыг хүн бүр мэднэ, тэгвэл анхаарвал зохих мэдээллийг хүргэе.
• Таны ходоод өвддөг бол хоосон байхдаа битгий алим ид. Ходоод гэдэсний эмгэгтэй хүмүүс өглөө алим идэх нь тохиромжгүй. Харин хоол идсэнээс хоёр цагийн дараа эсвэл унтахын өмнө идээрэй.
• Чихрийн шижин буюу цусан дахь сахарын хэмжээ хэлбэлздэг бол ходоод хоосон, өлөн үедээ алим идэх нь муу. Алимны сахарын агууламж нь 13,5 хувь учир сахарын хэмжээг өсгөнө. Мөн ходоод гэдэсний үйл ажиллагаанд муугаар нөлөөлж, хоол шингээх чадварыг бууруулна. Тиймээс сахарын өвчтэй болон илүүдэл жинтэй хүмүүсийг алим бага идэхийг зөвлөдөг байна.
• Алимны голд устөрөгчийн цианид бага хэмжээгээр агуулагддаг. Тиймээс голыг нь идэх хэрэггүй. Алимны голыг идсэнээр толгой эргэх, толгой өвдөх, амьсгалахад хүндрэл учрах зэрэг шинж тэмдэг илэрч болно. Хурдан хугацаанд биш ч гэсэн аажим аажимаар эрүүл мэндэд муугаар нөлөөлдөг байна.
• Мөн алимыг сайтар угааж хальстай нь хамт идэх хэрэгтэй. Ингэхдээ хүйтэн усаар угаа. Халуун юмуу бүлээн усаар угаавал хэт исгэлэн болдог байна.
Алимны талаар зарим мэдээлэл хүргэхэд:
– Алимыг Каспийн тэнгис болон Хар тэнгисийн дунд хавиас гаралтай гэж үздэг.
– Хүн төрөлхтөн МЭӨ 6500 оноос алимтай танилцсан баримтыг археологчид олсон гэдэг.
– 1 алим ургуулахад 50 ширхэг навчны энерги шаардлагатай
Дэлхийн алимны тариалалтын дийлэнхийг Хятад, АНУ, Турк, Польш, Итали улс хангадаг.
Сэтгэгдэл бичих