The Hu: ‘Чонон сүлд’ дуу биллбоардын шилдэг тавд багтав

The Hu хамтлагийн Чонон сүлд дуу Billboard чартын есдүгээр сарын эхний долоо хоногийн шилдэг тавд багтжээ. Дэлхий даяар цар тахлын улмаас хөл хорио тогтоосон ч Монголын The Hu хамтлагийн уран бүтээл дэлхийн дуу хөгжим сонирхогч, сонсогчдод хүрсээр байна.

Сарын өмнө (2020.08.14) хамтлагийн продюсер Б.Дашдондог дэлхийн шилдэг рок продюсеруудын нэгээр тодорсон билээ. Тэрбээр дэлхийн алдартай хөгжмийн Billboard жагсаалтад хоёрдугаарт бичигдэж, дэлхийн шилдэг хамтлаг, дуучдын продюсеруудыг ардаа орхисон баярт мэдээ дуулгасан.

The Hu хамтлаг өнгөрсөн 2019 оны есдүгээр сард The Hu хамтлагийн Gereg цомог Billboard чартыг тэргүүлж, түүхэн амжилтыг гаргасан билээ. Тухайн үед монгол хамтлаг монгол хэлээрээ дуулж гаргасан цомог Billboard-ыг тэргүүлж байгаа анхны тохиолдол байв.

Тэдний араас Солонгосын алдарт BTS хамтлагийн Map Of The Soul: PERSONA багтаж байгаа бөгөөд ийнхүү хэдэн долоо хоногийн турш Billboard-ыг тэргүүлээд байсан BTS-ийг The Hu хамтлаг ардаа орхисон билээ.