Саяхан Исландын эрдэмтэд жирэмслэлтэд кофеины үзүүлэх нөлөөллийг тодруулах зорилгоор 1200 орчим шинжлэх ухааны судалгаа, шинжилгээний ажилд дүн шинжилгээ хийсэн байна. Судалгааны үр дүнд кофеин нь зулбалт, ураг амьгүй төрөх, дутуу жинтэй төрөх, эрт үеийн цусны хорт хавдар, таргалалт гэсэн таван сөрөг үр дагаварт хүргэх эрсдэлтэй гэж үзжээ.
Судалгааг ахалсан Рейкьявик их сургуулийн профессор Жек Жеймсийн тайлбарлаж буйгаар есөн судалгаа тутмын наймд нь үр зулбалт кофеины хэрэглээтэй “нягт холбоотой” гэж үзжээ. Түүнчлэн төрөлтийн талаар хийсэн ажиглалтын таван судалгаа тутмын дөрөвт нь дутуу төрөлтөд кофеины хэрэглээ нөлөөлдөг, 10 судалгаа тутмын долоод нь бага жинтэй хүүхэд төрөхөд мөн л энэ бодис холбоотой болохыг дурдсан байжээ. Үүгээр зогсохгүй, кофеины хэрэглээ нэмэгдэхийн хэрээр эрсдэл өсдөг болохыг анхааруулж байна.
Шинэ судалгааны үр дүнг кофе үйлдвэрлэлийн салбарынхан үгүйсгэж, зарим эрдэмтэд санал нийлэхгүй байгаагаа илэрхийлжээ. Тэд өдөрт хоёр аяга буюу 200 мг-аас хэтрэхгүй кофе уух нь жирэмсэн эмэгтэйчүүдэд аюулгүй хэмээн зөвлөж байна.
Харин ДЭМБ кофеины хэт их хэрэглээ нь хүүхдийн өсөлт удааширч, жин буурах, дутуу эсвэл амьгүй төрөх зэрэг эрсдэлүүдийг нэмэгдүүлдэг байж болзошгүй гэдгийг хүлээн зөвшөөрч байгаа аж. Мөн өдөрт 300 мг-аас их кофе уудаг жирэмсэн эмэгтэйчүүдийг хэрэглээгээ танахыг зөвлөжээ.
Одоогоор Их Британи, АНУ, Европт мөрдөгдөж буй албан ёсны удирдамжид жирэмсэн эмэгтэйчүүдийн кофеины хэрэглээний дээд хязгаарыг тогтоогоогүй байгаа билээ. Мөн жирэмсэн эмэгтэйчүүд кофеин агуулдаг хүнс түгээмэл хэрэглэж байна. Үүнд кофеноос гадна энергийн ундаа, кола, шоколад, цай зэрэг багтдаг аж.
Эх сурвалж: The Guardian
