Улсын Нэгдүгээр төв эмнэлгийн удирдлагыг богино хугацаанд удаа дараа өөрчилсөн нь эмчилгээний өдөр тутмын үйл ажиллагаанд сөргөөр нөлөөлж, эм тариа болон эмнэлгийн багаж хэрэгслийн хангамж тасалдахад хүрсэн талаар эх сурвалжууд мэдээлж байна.
Тодруулбал, тус эмнэлгийн даргыг нэг долоо хоногийн хугацаанд гурван удаа сольсон нь удирдлагын тогтворгүй байдлыг үүсгэж, эм, эмнэлгийн хэрэгслийн худалдан авалт болон нийлүүлэлтийн үйл ажиллагаа саатсан гэж эмнэлгийн ажилтнууд мэдээлжээ. Үүний улмаас зарим тасагт өдөр тутам шаардлагатай эм тариа болон нэг удаагийн хэрэгслийн нөөц багассан байна.
Эмнэлгийн ажилтнуудын хэлж буйгаар удирдлагын ойр ойрхон өөрчлөлт нь байгууллагын дотоод зохион байгуулалтад нөлөөлж, санхүүгийн шийдвэр гаргалт болон нийлүүлэлтийн гэрээ хэлцэл удаашрах шалтгаан болсон байна.
Улсын Нэгдүгээр төв эмнэлэг нь улсын хэмжээнд лавлагаа шатлалын томоохон эмнэлгийн нэг бөгөөд өдөрт олон зуун иргэнд тусламж үйлчилгээ үзүүлдэг тул эм, хэрэгслийн хангамж доголдох нь эмчилгээний чанарт нөлөөлөх эрсдэлтэй гэж мэргэжилтнүүд анхааруулж байна.
Албаны эх сурвалжийн мэдээлснээр эмнэлгийн үйл ажиллагааг хэвийн болгох, эмийн нөөцийг тогтворжуулах чиглэлээр холбогдох арга хэмжээг авч эхэлжээ.
Сэтгэгдэл бичих