Хойд Солонгосын удирдагч Ким Жон Ун АНУ бодлогоо өөрчилбөл хоёр улс сайн харилцаатай байж чадна гэж мэдэгдлээ. Тэрбээр АНУ Хойд Солонгосын одоогийн статусыг хүлээн зөвшөөрч, дайсагнасан бодлогоосоо татгалзвал “АНУ-тай эвтэй найртай байхгүй гэх шалтгаан бидэнд байхгүй” гэж хэлсэн байна. Мөн “Хойд Солонгос болон АНУ-ын харилцааны ирээдүй бүхэлдээ АНУ-ын хандлагаас шалтгаална” гэж онцолжээ. Хэрэв Вашингтон сөргөлдөөнтэй байр сууриа хадгалбал Хойд Солонгос “хариу арга хэмжээ” авна гэж анхааруулсан байна. Тус улсын Төв мэдээллийн агентлагийн мэдээлснээр, Ким Жон Ун өнгөрөгч Баасан, Бямба гаригт (2026.02.20.21) болсон Солонгосын Хөдөлмөрийн намын есдүгээр их хурлын бодлогын тойм хуралдааны үеэр тус мэдэгдлийг гаргасан.
Тэрбээр “Энх тайван зэрэгцэн орших эсвэл мөнхийн сөргөлдөөн байх эсэх нь биднээс шалтгаалахгүй. Бид аль алинд нь бэлэн” гэж хэлжээ.
Харин Өмнөд Солонгосын талаар Ким шүүмжлэлтэй байр суурь илэрхийлсэн байна. Тэрбээр Өмнөд Солонгосын засгийн газрын яриа хэлэлцээ хийх санал, эвлэрэх оролдлогыг “хуурамч” гэж нэрлэжээ. Мөн “Бид Өмнөд Солонгостой ямар ч ажил хэрэг явуулахгүй. Тэд бол хамгийн дайсагнагч этгээд” гэж хэлсэн байна. Улмаар Өмнөдийн эвлэрэх хандлагыг тэр “болхи хуурмаг явдал” гэж тодорхойлсон байр сууриндаа бат зогсож байна.
Ким Жон Ун Хойд Солонгос бол цөмийн зэвсэгтэй улс гэдгийг дахин нотолж, цөмийн хүчээ улам бэхжүүлэхээ амласан байна. Тэрбээр “Манай намын хатуу бөгөөд хувиршгүй зорилго бол улсын цөмийн хүчийг улам бэхжүүлж, цөмийн зэвсэгтэй улсын статусаа бүрэн хэрэгжүүлэх явдал” гэж мэдэгджээ. Мөн цөмийн зэвсгийг улс орны аюулгүй байдал, ашиг сонирхлын баталгаа, хамгаалалтын хэрэгсэл гэж тодорхойлсон байна.
Сэтгэгдэл бичих