Олон улсын авлигын эсрэг судалгааны байгууллага болох Transparency International-аас жил бүр танилцуулдаг Авлигын төсөөллийн индексийн 2025 оны тайланд Монгол Улсын үнэлгээ өмнөх оноос хоёр нэгжээр буурч 31 оноо болсныг Транспэрэнси Интернэшнл Монгол мэдээллээ.
Ингэснээр Монгол Улс уг индекст хамрагдсан 182 улс, нутаг дэвсгэрээс 124 дүгээрт эрэмбэлэгдсэн бөгөөд өнгөрсөн онд 180 орноос 114 дүгээр байрт жагсаж байсантай харьцуулахад байр нь мэдэгдэхүйц доошилсон үзүүлэлт болж байна. Эрэмбийн хувьд Монгол Улс 31 оноотой Беларусь, Жибути, Найжер, Турк, Узбекистан зэрэг улстай ижил байр эзэлжээ.
Сүүлийн арван жилийн хугацаанд Монгол Улсын оноо болон эрэмбэ буурах хандлагатай байсаар ирсэн бөгөөд 2025 оны 31 оноо нь индексийн аргачлал шинэчлэгдсэн 2012 оноос хойших хамгийн доогуур үнэлгээ болж буйг тайланд онцолсон байна. Харин дэлхийн дундаж үзүүлэлт өнгөрсөн онд 42 оноо байсан нь мөн түүхэн доод түвшинд тооцогдож буйг судалгаанд дурджээ.
Тайланд Монгол Улсад бизнесийн орчин хүндэрсэн, хувийн хэвшлийн итгэл сулрах хандлага нэмэгдсэн, хууль эрх зүйн орчин тогтворгүй, хуулийн засаглалын хэрэгжилт хангалтгүй хэвээр байгаа зэрэг хүчин зүйлс авлигын төсөөлөлд сөргөөр нөлөөлж буйг онцолсон байна.
Үүнтэй холбоотойгоор улс төрийн намын санхүүжилтийн ил тод байдлыг нэмэгдүүлэх, төрийн өмчит компаниудын зах зээл дэх давамгай оролцоог бууруулж, хувийн хэвшилтэй өрсөлдөх нөхцөлийг тэнцвэржүүлэх, мөн төрийн өмчит аж ахуйн нэгжүүдийн засаглал, удирдлагын томилгоог чадавх, ил тод шалгуурт тулгуурлах шаардлагатайг анхааруулжээ.
Индексийн энэхүү дүн нь Монгол Улсад авлигын эсрэг бодлого, институцийн шинэчлэл, ил тод байдлын механизмыг эрчимжүүлэх шаардлага хэвээр байгааг дахин сануулсан үзүүлэлт болж байна.
Сэтгэгдэл бичих