УИХ-ын гишүүн П.Сайнзоригтой холбоотой зодооны шинжтэй хэрэг энэ сарын 5-наас 6-нд шилжих шөнө нийслэлийн Сүхбаатар дүүргийн I хорооны нутаг дэвсгэрт байрлах “Шангрила” зочид буудлын B1 давхарт үйл ажиллагаа явуулдаг цэнгээний газарт болсон гэх мэдээлэл байна. Уг асуудлыг цагдаагийн байгууллага шалгаж эхэлсэн талаар эх сурвалжууд мэдээлжээ.
Зарим цахим мэдээллийн хэрэгслээр мэдээлснээр, тухайн үед П.Сайнзориг нь “Херо энтертайнмент”-ийн уран бүтээлчидтэй хамт байсан бөгөөд Тагнуулын ерөнхий газрын дарга асан Б.Хурцын хүү Х.Тайван тэргүүтэй залуустай таарч маргаан үүсгэсэн гэх мэдээлэл гарсан байна. Маргааны үеэр хэл амаар доромжилсон, улмаар харилцан биедээ халдсан байж болзошгүй тухай бичсэн ч албан ёсны байгууллагуудаас энэ мэдээллийг хараахан баталгаажуулаагүй байна.
Одоогоор Х.Тайван болон П.Сайнзориг нар хоёулаа Шүүхийн шинжилгээний ерөнхий газарт хандан биед учирсан гэмтлийн зэргийг тогтоолгохоор хандсан бөгөөд шинжилгээний дүгнэлт гараагүй байгаа аж. Хэргийг шалгах ажиллагаа үргэлжилж байгаа тул албан ёсны дүгнэлт гарахаас өмнө хэргийн талаар эцэслэн дүгнэх боломжгүйг хууль хяналтын байгууллагын эх сурвалжууд онцолж байна.
Иймд уг хэрэгтэй холбоотой мэдээлэл нь одоогоор мөрдөн шалгах шатанд байгаа бөгөөд холбогдох байгууллагын албан ёсны дүгнэлт, шийдвэр гарах хүртэл талуудын байр суурь болон хэвлэл мэдээллийн эх сурвалжийн мэдээллийг нягтлах шаардлагатай хэвээр байна.
эх сурвалж: zaluus.com
Сэтгэгдэл бичих