Итали улсын Милан–Кортина хотноо зохион байгуулагдаж буй өвлийн XXV олимпын наадмын уран гулгалтын багийн төрөл өндөрлөж, АНУ-ын шигшээ баг алтан медаль хүртэн аваргын цолоо амжилттай хамгааллаа. Японы баг онооны тун ойрхон зөрүүтэй мөнгөн медаль хүртсэн бол зохион байгуулагч орны тамирчид болох Италийн баг хүрэл медалийн эзэн болж, талбай дээрээ медалийн тавцанд зогсов.
Тэмцээний шийдвэрлэх мөч болох эрэгтэйчүүдийн чөлөөт үзүүлбэрийн өмнө АНУ болон Японы багууд нийт оноогоор тэнцээд байсан нь өрсөлдөөнийг туйлын ширүүн болгосон юм. АНУ-ын гол найдвар, 21 настай од тамирчин Илиа Малинин өөрийн онцлох элемент болох дөрвөн эргэлттэй аксель үсрэлтийг гүйцэтгэх үеэрээ алдаа гаргасан ч дараагийн техникт өндөр төвшний гүйцэтгэл үзүүлж, үзэгчдийг огшоосон арагшаа эргэлттэй үсрэлтээр онооны алдагдлаа нөхөж чадсан байна. Тэрбээр 200.03 оноо авч чөлөөт үзүүлбэрт тэргүүлснээр багтаа хамгийн дээд 10 оноог авчирч, АНУ-ын ялалтыг баталгаажууллаа.
Харин Японы тамирчин Шүн Сато алдаагүй гүйцэтгэл үзүүлж, улирлынхаа хамгийн өндөр үнэлгээ болох 194.86 оноог авсан ч багийн нийлбэр дүнгээр АНУ-ыг гүйцэж чадсангүй. Гэсэн ч түүний тогтвортой, цэвэр техник Японы багийг мөнгөн медалийн болзол хангахад чухал нөлөө үзүүлсэн юм.
Зохион байгуулагч Италийн багийн хувьд туршлагатай тамирчин Маттео Риццо 179.62 оноо авч гуравдугаар байрт шалгарснаар багийнхаа медалийн найдвар болж, гурав дахь олимпдоо амжилттай оролцлоо. Итали улсын баг нийт дүнгээр хүрэл медаль хүртсэн нь талбайн эздийн хувьд томоохон амжилтад тооцогдож байна.
Хосын чөлөөт үзүүлбэрт Японы Рику Миура, Рюүичи Кихара нар улирлынхаа дээд амжилт болох 155.55 оноо авч өрсөлдөгчдөөсөө илт тасран тэргүүлсэн нь багийн амжилтад шийдвэрлэх нөлөө үзүүлэв. Тэдний гүйцэтгэл техникийн нарийвчлал, уран сайхны илэрхийллээрээ онцгой байж, шүүгчдээс өндөр үнэлгээ хүртсэн юм. Миура үзүүлбэрийн дараа өгсөн ярилцлагадаа “145 орчим оноо авна гэж зорьсон ч 155.55 гэдгийг хараад сэтгэл хөдлөлөө барьж дийлээгүй” хэмээн онцолсон байна. Энэ төрөлд Гүржийн хос тамирчид хоёрдугаар байрт, Италийн хос гуравдугаар байрт орсон нь Европын багуудын өрсөлдөх чадварыг илтгэв.
Эмэгтэйчүүдийн чөлөөт үзүүлбэрт “Бээжин-2022” олимпын хүрэл медальт Каори Сакамото 148.62 оноо авч төрөлдөө тэргүүлэн Японы багт дахин 10 оноо нэмэрлэв. Түүний тогтвортой гүйцэтгэл, уран сайхны илэрхийлэл өндөр үнэлэгдсэн бөгөөд “Энд өрсөлдөж буй тамирчид бүгд алтан медалийн хэмжээний үзүүлбэр үзүүлсэн. Медалийн өнгө тийм ч чухал биш” хэмээн сэтгэгдлээ илэрхийлсэн байна. Гүржийн Анастасия Губанова хоёрдугаар байрт орсон бол АНУ-ын тамирчин Эмбер Гленн гуравдугаар байр эзэлж, багтаа үнэт оноо авчирлаа. Тэрбээр олимпын дебютээ хийж буйгаа онцлон, багийн төрөлд оролцсон туршлага нь ганцаарчилсан төрөлд сэтгэл зүйн бэлтгэл болсон хэмээн мэдэгдсэн юм.
Ийнхүү уран гулгалтын багийн тэмцээн техник, ур чадвар, сэтгэл зүйн тэсвэр шалгасан өрсөлдөөн дунд өндөрлөж, АНУ-ын баг аваргын байр сууриа хадгалж чадлаа. Япон улс бүх төрлөөр жигд тоглолт үзүүлснээр мөнгөн медалийг хүртсэн бол Итали улс талбай дээрээ медаль авсан нь үзэгчдийн халуун алга ташилтаар шагнагдсан онцлох үйл явдал болов. Уран гулгалтын ганцаарчилсан төрлүүд цаашид олимпын хөтөлбөрийн хамгийн их хүлээлттэй өрсөлдөөнүүдийн нэг хэвээр үргэлжлэх төлөвтэй байна.
Сэтгэгдэл бичих