Иргэд, аж ахуйн нэгжүүд их хэмжээний бараа бүтээгдэхүүн худалдах явцдаа залилуулж, их хэмжээний хохирол амсах тохиолдол бүртгэгдсээр байна. Тухайлбал, 5 тонн мах худалдаалж, мөнгөө авч чадалгүй залилуулсан хэрэг Цагдаагийн ерөнхий газарт бүртгэгджээ. Тодруулбал, иргэн Б нь үл таних этгээдэд 5 тонн махыг 72 сая 300 мянган төгрөгөөр худалдаалсан боловч төлбөрөө авч чадаагүй байна. Тухайн этгээд барааг хүлээн авсны дараа төлбөр шилжүүлээгүй бөгөөд уг үйлдлийг залилангийн шинжтэй гэж үзэн Хан-Уул дүүргийн Цагдаагийн 2 дугаар хэлтэс шалгаж байгаа аж.
Цагдаагийн байгууллагын мэдээлснээр сүүлийн үед бараа бүтээгдэхүүнийг их хэмжээний мөнгөн дүнгээр худалдах үедээ гэрээ хэлэлцээргүй, мөнгөн гүйлгээг баталгаажуулалгүйгээр бараагаа шилжүүлэх явдал түгээмэл байгаа нь залилангийн хохирол үүсэх гол шалтгаан болж байна.
Иймд иргэд, аж ахуйн нэгжүүд худалдан авагчийн хувь хүн эсэх, аж ахуйн нэгжийн бүртгэлтэй эсэхийг нягтлах, төлбөрийн чадвартай эсэхийг шалгах, худалдах, худалдан авах гэрээг заавал бичгээр байгуулах, мөнгөн шилжүүлгийг бүрэн хүлээн авсны дараа бараа бүтээгдэхүүнийг өгөх, гүйлгээний баримт, баталгааг заавал шалгах зэрэгт онцгой анхаарахыг сэрэмжлүүллээ. Мөн Цагдаагийн байгууллагаас иргэдийг ямар ч нөхцөлд итгэлцлийн үндсэн дээр их хэмжээний бараа, мөнгийг шилжүүлэхээс татгалзаж, хууль, журмын дагуу өөрийн эрх ашгаа хамгаалж ажиллахыг уриалж байна.
ЭХ СУРВАЛЖ:NEWS.MN
Сэтгэгдэл бичих