Нийслэлийн Агаар, орчны бохирдолтой тэмцэх газрын дарга Д.Мөнхбаатар болон холбогдох албаныхан өнөөдөр Дулааны дөрөвдүгээр цахилгаан станцад урьдчилан сэргийлэх хяналт шалгалт хийж ажиллалаа. Энэ үеэр станцаас гарах хаягдал утааны агууламж, ялгарлын хэмжээ, шүүлтүүрийн үйл ажиллагаа зэрэгт хяналт тавив.
Японы олон улсын хамтын ажиллагааны байгууллага JICA Монгол Улсад агаар бохирдуулагч эх үүсвэрийн ялгарлын инвенторын судалгааг хийсэн. Уг судалгаагаар Монгол Улсын таван дулааны цахилгаан станц өнгөрсөн онд нийт 5.8 сая тонн түүхий нүүрс түлсэн байна. Мөн Улаанбаатар хотод хөдөлгөөнд оролцож буй 805 мянган тээврийн хэрэгслээс ялгарах агаар бохирдуулагч бодисын хэмжээ нь 134 мянган өрхийн яндангаас гарах бохирдуулагч бодисын хэмжээтэй дүйцдэг. Харин гэр хорооллын 172 мянган өрхийн яндангаас ялгарах агаар бохирдуулагч бодисын хэмжээ 3.5 дулааны цахилгаан станцаас ялгарах агаар бохирдуулагч бодисын хэмжээтэй тус тус дүйцэж буй судалгаа гарчээ.
Энэ үеэр нийслэлийн Агаар, орчны бохирдолтой тэмцэх газрын дарга Д.Мөнхбаатар “Улаанбаатар хотод нийслэлийн эрчим хүч, дулааныг хангадаг таван дулааны станц бий. Эдгээрээс ДЦС-4 нь хамгийн сүүлийн үеийн хоёр төрлийн шүүлтүүртэй. Нэг нь ионжуулалтын технологиор агаарт дэгдэж буй бохирдлыг өөртөө татдаг. Нөгөө нь хуурай аргаар PM2.5, PM10 тоосонцрыг унагааж шүүдэг. Гэсэн ч нийслэлийн таван станц нийлээд жилд 5.8 сая тонн түүхий нүүрс түлж буй нь гэр хорооллоос ялгарах утаа болон бусад эх үүсвэртэй нийлээд агаарын бохирдолд нөлөөлж байна. Иймд бид урьдчилан сэргийлэх хяналт шалгалтыг тогтмол хийж, шүүлтүүрийн ажиллагааг бүрэн хангахыг зорьж байна. Мөн тээврийн хэрэгслийн утаанд 270 гаруй төрлийн химийн бодис агуулагддаг. Тэдгээрийн дунд хүнд металл болон бензол, формальдегид зэрэг хорт хавдар үүсгэгч бодис агуулагддаг. Тус бодисууд агаарт дээш дэгддэггүй, газрын түвшинд тогтдог тул иргэд авто замын ойролцоо явган зорчих үедээ N95 болон түүнээс дээш стандартад нийцсэн маск зүүхийг зөвлөж байна” гэлээ.
Нийт судалгаагаар замын хөдөлгөөнд оролцож буй суудлын автомашин хамгийн их нягтшилтай, агаар бохирдуулагч бодисын ялгарлын хэмжээ их, агаарын бохирдолд үзүүлэх нөлөө хамгийн өндөр байна. Харин Дулааны цахилгаан станц нь нийслэлийн эрчим хүч, дулааныг үйлдвэрлэж, хангадаг гол байгууламж бөгөөд нийслэлийн хүн ам нэмэгдэж, хотын барилга байгууламж ихсэх тусам үйлдвэрлэлийн хүчин чадлыг нэмэгдүүлэх шаардлагатай болдог тул жилээс жилд зарцуулах нүүрсний хэмжээ ч мөн нэмэгддэг. Иймд түлшний шаталтаас үүдэлтэй агаар бохирдуулах бодисын ялгарал их байдаг. Гэвч агаарын бохирдолд үзүүлэх нөлөөллийн хувьд бусад эх үүсвэр болох гэрийн яндан, автомашинтай харьцуулахад харьцангуй бага байдаг аж.
Сэтгэгдэл бичих