Нийслэлийн Эрүүгийн хэргийн давж заалдах шатны шүүхийн шүүх “Ногоон автобусны хэрэг” гэх тодотголтой 24 хүнд холбогдох хэргийг шүүгдэгч, хохирогч, иргэний хариуцагч, тэдгээрийн өмгөөлөгч нарын гаргасан давж заалдах гомдлууд болон прокурорын бичсэн эсэргүүцлийг үндэслэн 2025 оны 10 дугаар сарын 23-ны өдрөөс 2025 оны 10 дугаар сарын 30-ны өдөр хүртэлх хугацаанд хянан хэлэлцэж, дараах шийдвэрийг гаргалаа.
Нэр бүхий шүүгдэгч нарт холбогдох хэрэгт зүйлчлэлийг хөнгөрүүлж өөрчилөн, тэдгээрт анхан шатны журмаар шүүхээс оногдуулсан ял шийтгэл болох нийтийн албанд ажиллах эрхийг хасах, зорчих эрхийг хязгаарлах ялууд зүйл заалтад заагдсан хэмжээгээр өөрчлөгдсөн, хайнга хандах гэмт хэрэгт гэм буруутайд тооцогдсон шүүгдэгч нараас нэр бүхий 3 шүүгдэгч Ж.Сүхбаатар, О.Лувсандагва, О.Хонгорзул нар нь гэм буруугаа өөрсдөө сайн дураараа хүлээн зөвшөөрсөн тул ял хөнгөрүүлэх нөхцөл байдлыг тухайн гэмт хэрэгт оролцсон, хандсан хандлага зэрэг нөхцөл байдлыг харгалзан үзэж торгох ял оногдуулж бусад шүүгдэгч нарт зорчих эрх хязгаарлах ял оногдуулах нь зүйтэй энэ нь Эрүүгийн хуулийн ерөнхий ангид заасан ял оногдуулах зарчим шаардлагад нийцнэ гэж шүүх бүрэлдэхүүн дүгнэлээ.
– Шүүгдэгч А.Ганхуягт Эрүүгийн хуулийн тусгай ангийн 22.1 дүгээр зүйлийн 1 дэх хэсэгт зааснаар нийтийн албанд ажиллах эрхийг 3 жилийн хугацаагаар хасаж, 3 жилийн хугацаагаар хорих ял гэснийг хэвээр үлдээж,
– Шүүгдэгч С.Бямбасүрэн Эрүүгийн хуулийн тусгай ангийн 22.1 дүгээр зүйлийн 1 дэх хэсэгт зааснаар нийтийн албанд ажиллах эрхийг 2 жилийн хугацаагаар хасаж, 1 жил 6 сарын хугацаагаар зорчих эрх хязгаарлах ял,
– Шүүгдэгч Б.Түмэнжаргал, Ш.Баярсүх нарыг Эрүүгийн хуулийн тусгай ангийн 23.5 дугаар зүйлийн 1 дэх хэсэгт зааснаар нийтийн албанд ажиллах эрхийг 1 жилийн хугацаагаар хасаж, 6 сарын хугацаагаар зорчих эрх хязгаарлах ял,
– Шүүгдэгч Ж.Эрдэнэбатад Эрүүгийн хуулийн тусгай ангийн 22.1 дүгээр зүйлийн 1 дэх хэсэгт зааснаар нийтийн албанд ажиллах эрхийг 2 жилийн хугацаагаар хасаж 1 жил 3 сарын хугацаагаар зорчих эрх хязгаарлах ялаар
– Шүүгдэгч С.Жавхлантбаатарт Эрүүгийн хуулийн тусгай ангийн 22.1 дүгээр зүйлийн 1 дэх хэсэгт зааснаар нийтийн албанд ажиллах эрхийг 4 жилийн хугацаагаар хасаж, 3 жилийн хугацаагаар хорих ял оногдуулсаныг хэвээр үлдээж,
– Шүүгдэгч А.Чойжилсүрэнд Эрүүгийн хуулийн тусгай ангийн 22.1 дүгээр зүйлийн 1 дэх хэсэгт нийтийн албанд ажиллах эрхийг 1 жил 6 сарын хугацаагаар хасаж, 1 жилийн хугацаагаар зорчих эрхийг хязгаарлах ял,
– Шүүгдэгч Б.Мөнхболд Б.Баярмаа, Ц.Хадбаатар Б.Дөлгөөн Д.Цогтбадрах нарт Эрүүгийн хуулийн тусгай ангийн 23.5 дүгээр зүйлийн 1 дэх хэсэгт зааснаар нийтийн албанд ажиллах эрхийг 1 жилийн хугацаагаар хасаж, тус бүр 6 сарын хугацаагаар зорчих эрх хязгаарлах ял
– Шүүгдэгч О.Лувсандагва, Ж.Сүхбаатар, О.Хонгорзул нарт Эрүүгийн хуулийн тусгай ангийн 23.5 дүгээр зүйлийн 1 дэх хэсэгт зааснаар нийтийн албанд ажиллах эрхийг 1 жилийн хугацаагаар хасаж, тус бүр 3 сая төгрөгөөр торгох ял оногдуулж шийдвэрлэлээ.
НИЙСЛЭЛИЙН ЭРҮҮГИЙН ХЭРГИЙН ДАВЖ ЗААЛДАХ ШАТНЫ ШҮҮХ
Discussion about this post