-Эхлээд Ц.Сандуйг, дараа нь А.Ганбаатарыг явууллаа. Одоо М.Энхболдыг явуулах уу?-
Хууль, хяналтын байгууллагаас МАН-ын нэр хүндийг газарт унагаж, “шороотой нь хутгасан” 60 тэрбумын хэргийг одоо ч эцэслээгүй, Авлигатай тэмцэх газар /АТГ/ болон Тагнуулын ерөнхий газар /ТЕГ/-ын хамтарсан Ажлын хэсэг мөрдөн шалгах ажиллагааг үргэлжлүүлж байгаа.
Гэсэн ч эрх баригч намынхан энэ хэрэгт нэр холбогдсон УИХ-ын дарга асан М.Энхболд, НИТХ-ын төлөөлөгч Ц.Сандуй, түүний туслахаар ажиллаж байсан А.Ганбаатар нарт улс төрийн хариуцлага тооцож эхэллээ.
Өөрөөр хэлбэл, хэдхэн хоногийн өмнө МАН-ын Хяналтын ерөнхий хороо хуралдаж, төрийн өндөр албан тушаалыг 60 тэрбум төгрөгөөр үнэлж, наймаалцахыг завдсан хэрэгт нэр холбогдсон Ц.Сандуй, А.Ганбаатар нарыг намаасаа хөөх шийдвэрийг гаргаад байна.
Өнгөрсөн мягмар гарагт /2019.02.20/ МАН-ын Хяналтын ерөнхий хорооноос гарсан шийдвэрийг олон нийтэд мэдээлэх үеэрээ УИХ-ын дарга асан М.Энхболдод ч улс төрийн хариуцлага тооцохоо мэдэгдсэн билээ.
Эрх баригч намын эл шийдвэрийг олон нийт болон улс төрийн хүрээнийхэн МАН-ын дарга, Ерөнхий сайд У.Хүрэлсүх “их цэвэрлэгээ”-гээ эхлүүлээ гэж харж байгаа юм.
Учир нь, Ерөнхий сайд У.Хүрэлсүх МАН-ын дарга болсон даруйдаа 60 тэрбумын хэргийг эцэслэж, нам дамжсан МАНАН бүлэглэлээс төр болон намаа цэвэрлэхээ илэрхийлсэн байдаг.
Ямартай ч МАН-ын дарга, Ерөнхий сайд У.Хүрэлсүх хэлсэн амандаа хүрч намынхаа нэр хүндийг унагасан 60 тэрбумын хэрэгт нэр холбогдсон нөхдийг намаасаа хөөж, улс төрийн хариуцлага тооцож эхэллээ.
Эхлээд Ц.Сандуйг, дараа нь А.Ганбаатарыг намаасаа явууллаа. Тэгвэл МАН-аас явах дараагийн хүн нь М.Энхболд гэдэг нь тодорхой болж байх шиг байна.
Сэтгэгдэл бичих