Зүүн дөрвөн замын автобусны буудлын урд байсан шатсан “East” төвийг нураасан. Ингээд Нийслэлээс тус төвийн суурин дээр цэцэрлэгт хүрээлэн байгуулахаар санаачилсан.
Өмнө нь энэ газарт Манжийн төрийн үеийн “Бат цагаан” нэртэй шорон байсан гэдэг. Тэрхүү шоронд гамингууд Монголын эх оронч баатар Манлай баатар Ж.Дамдинсүрэн, Д.Бодоо, С.Данзан нарыг хорьж байв. Түүнчлэн 1930-аад онд Д.Нацагдорж, Б.Ренчин, С.Буяннэмэх, Д.Намдаг нарыг тус шоронд хорьж байсан.
1950-аад оны сүүлчээр шоронгийн үйл ажиллагаа зогсож, арьс өнгөний эмнэлэг болсон бол 1990-ээд оны үед барилга нь муудсан тул сууриар нь нураасан байна. Улмаар “East” төв гэх худалдаа, үйлчилгээний байгууламж бий болж байж.
Энэхүү түүхийг үндэслэн эх орныхоо тусгаар тогтнолын төлөө амиа өргөсөн баатарлаг эрсийн дурсгалд зориулсан цэцэрлэгт хүрээлэн байгуулах саналыг 2022 оны зургаадугаар сард Д.Сумъяабазар Нийслэлийн Засаг дарга байхдаа гаргаж эзэмшигч аж ахуйн нэгж байгууллагын удирдлагыг хэлэлцээрийн ширээнд урьж байсан.
Тэгвэл тухайн газрын суурин дээр “Хархорум виллаж” нэртэй сууц баригдаж эхэлжээ. Энэ газрын одоогийн эзэмшигч болох “Пром-Импорт” ХХК юм байна. Тэд 16 давхар худалдаа, үйлчилгээний цогцолбор барихаар архитектур төлөвлөлтийн даалгавраа батлуулсан аж.
Discussion about this post