Засгийн газар өнгөрсөн долоодугаар сарын 7-ны хуралдаанаараа аймаг, сумд дур мэдэн хөл хорио тогтоохыг хориглосон шийдвэр гаргасан. Хөл хорио тогтоох шаардлагатай тохиолдолд Улсын онцгой комиссоос үнэлгээ хийж, Засгийн газраас шийдвэр гаргаж байхаар болсон юм. Энэ талаар Улсын онцгой комиссын нарийн бичгийн дарга Т.Баярхүү тухайн үед мэдээлэл хийхдээ “Одоогийн байдлаар 18 аймгийн 196 сум, зургаан тосгонд хязгаарлалтын дэглэм тогтоосон байгаа. Эдгээрээс долоодугаар сарын 9-нөөс эхлэн 13 аймгийн 101 суманд хязгаарлалтын хугацаа дуусна. Хязгаарлалт нь дуусч байгаа аймгууд цаашид нэмэлтээр хязгаарлалт тогтоохгүй. Одоо тогтоосон хязгаарлалтын дэглэмийг сунгахгүй байх чиглэлийг аймаг, орон нутгийн удирдлагуудад өглөө” гэсэн юм.
Засгийн газрын дээрх шийдвэр өөрчлөгдөөгүй гэж ойлгож байгаа. Учир нь, Засгийн газар шийдвэрээ өөрчилсөн тохиолдолд тухай бүрт нь мэдэгдэх ёстой. Гэвч Баян-Өлгий аймаг энэ сарын 15-наас эхлэн 10 хоног хөл хорио тогтоохоор болжээ. Тус аймгийн Засаг дарга Д.Бауыржан 10 хоног хөл хорио тогтоож, Улаанбаатар хот, бусад аймгаас ирэх зорчигчдыг хүлээж авахгүй гэдгийг мэдэгдлээ.
Тус аймагт долоодугаар сарын 1-нээс наймдугаар сарын 10-ны Улаанбаатар хот болон бусад аймаг, сумдаас 2946 тээврийн хэрэгсэл ирж, 18122 хүн зочилсон байна. Үүнтэй холбоотойгоор аймгийн хэмжээнд долоодугаар сард батлагдсан тохиолдлын тоо эрчимтэй нэмэгдсэн бөгөөд одоогийн байдлаар зургаан хүн нас баржээ.
Сэтгэгдэл бичих