‘Токио-2020’ олимпын гол цэнгэлдэх хүрээлэнд хөнгөн атлетикийн ‘Сэйко алтан гранпри’ тэмцээн наймдугаар сарын 23-ны ням гаригт болжээ. 2019 оны арванхоёрдугаар сард нээлтээ хийсэн шинэ цэнгэлдэхэд COVID-19 цар тахлаас хойш ийнхүү анх удаа олон нийтийн арга хэмжээ боллоо.
‘Japan National Stadium’ нэртэй цэнгэлдэх хүрээлэн нь ‘Токио-2020’-ийн үеэр албан ёсны нээлт, хаалтын ёслолоос гадна хөнгөн атлетикийн тэмцээн хүлээн авах хуваарьтай юм.
Японд одоогоор хөл бөмбөг, бэйсболын лигийн тэмцээнд 5000 хүртэл тооны үзэгч оруулахыг зөвшөөрч байгаа боловч ‘Сэйко алтан гранпри’-г үзэгчгүйгээр, зөвхөн тамирчид, дасгалжуулагчид, цөөн сэтгүүлчийн бүрэлдэхүүнтэй явуулж, телевизээр шууд дамжуулжээ.
Тэмцээнд Японы бүх шилдэг тамирчид оролцсоны дээр тус улсад суурьшин бэлтгэл сургуулилтаа хийдэг гадаадын зарим тамирчныг оролцуулсан байна.
