Англи залуу Өмнөд Солонгосын ‘BTS’ хамтлагийн Чиминтэй адилхан болохын тулд гоо сайхны мэс засал хийлгэхэд 149 мянган фунт /Английн 1 фунт-3722.00төгрөг/ зарцуулсан тухай Английн ‘Unilad’ сайт онцолжээ.
Оли Ландон гэгч 30 настай залуу Чиминтэй адилхан болохын тулд долоон жилийн дотор хамрын хэлбэрээ таван удаа өөрчилж, зовхио янзлуулж, арьсаа татуулсан байна. Сүүлийн нэг жилийн дотор гэхэд 24 мянган фунтын гоо сайхны мэс засал хийлгэжээ. Ландон нь шүтээн дуучинтайгаа улам адил болохын тулд цаашдаа ч мэс засал хийлгэх төлөвлөгөөтэй байгаа гэдгээ хэлжээ.
Гуя ба гэдэсний өөхийг соруулж, урууландаа тогтмол суулгац шахуулж, зовхио татуулах бас нэг хагалгаа хийлгэнэ гэжээ. Тэрээр хэлэхдээ: ‘Би өөртөө илүү итгэлтэй болсон болохоор сэтгэл хангалуун байна. Өөртөө баяр баясал авчирдаг зүйлс дээр анхаарч сурсан’ гэжээ.
Ландон нь анх 2013 онд Өмнөд Солонгост амьдарч байхдаа ‘BTS’ хамтлагийн шүтэн бишрэгч болсон бөгөөд ‘Миний амьдрал зөвхөн К-Поптой холбоотой байгаасай гэж хүсдэг, Чимин бол миний хувьд төгс төгөлдөрийн туйл болохоор би түүн шиг харагдахыг хүсдэг. Түүний уруул, эрүү, дуу хоолой бүх зүйл’ хэмээжээ.
/Түүний өмнөх болон одоогийн зураг/
