Жижиг, дунд үйлдвэрлэлийг хөгжүүлэх сангаас зээл авсан албан тушаалтнууд У.Хүрэлсүхийн албан тушаалын бялууны хувиарлалтаас хүртэж эхэллээ. Үүний нэг нь болох Засгийн газрын хэрэг эрхлэх газрын дэд дарга асан, шадар сайдын зөвлөхөөр ажиллаж байсан Б.Бат-Эрдэнэ Шударга өрсөлдөөн, хэрэглэгчийн төлөө газрын даргын албан тушаалд очжээ. Тэрээр Засгийн газрын хэрэг эрхлэх газрын дэд даргаар ажиллаж байхдаа эхнэр н.Болортуяагийнхаа “Рич холдинг” ХХК-иар дамжуулан ЖДҮ сангаас 400 сая төгрөгийн зээл авсан болох нь тодорхой болсон юм.
2020 оны Улсын их хурлын сонгуульд Эрдэнэт хотод хүч үзэхээр эртнээс бэлтгэлээ хангаж байсан ч түүнийг усалсан тойргоо Монголын Эмэгтэйчүүдийн холбооны дарга Б.Оюунгэрэлд алдсан гэх мэдээлэл сонгуулийн үеэр цацагдаж байлаа.
Шударга өрсөлдөөн хэрэглэгчийн төлөө газрын даргаар О.Магнай, Т.Аюурсайхан гээд хэлэх үгээ хэлчихдэг залуучууд томилогдож ирсэн. Өнгөрсөн дөрвөн жилийн хугацаанд тус байгууллагыг Б.Лхагва удирдсан бол энэ удаа Ерөнхий сайд У.Хүрэлсүх Б.Бат-Эрдэнэд итгэл хүлээлгэжээ.
