Монгол банкны Ерөнхийлөгч Б.Лхагвасүрэн зээлийн хүүг бууруулах хөтөлбөр бэлэн болсныг зарлалаа. Тэрээр “Зээлийн хүү бууруулах хөтөлбөр бараг бэлэн болчихлоо. Өчигдөр их хурлын гишүүд, монголбанк, бусад холбогдох байгууллагын төлөөллөөс бүрдсэн ажлын хэсэг маань УИХ-ын даргад танилцуулж зарчмын шийдэлд хүрлээ. Удахгүй хэлэлцэгдэх байх” хэмээн твиттер хуудастаа мэдэгджээ.
Улсын Их Хурлын дарга Г.Занданшатар өнгөрсөн сарын сүүлээр арилжааны банкуудын удирдлагуудыг хүлээн авч уулзахдаа банкны зээлийн хүүг бууруулах, экспорт, үйлдвэрлэлийг дэмжих зээлийг нэмэгдүүлэх, банк санхүүгийн салбарт реформ хийх зэрэг асуудлаар санал солилцсон юм.
Энэ үеэр Улсын Их Хурлын дарга Г.Занданшатар ээлжит бус чуулганаар зээлийн хүү бууруулах стратегийг тодорхойлсон УИХ-ын тогтоол батлах тухай онцолж байсан нь ийнхүү биелэлээ олоход тун ойрхон болжээ.
