Ховд аймгийн төвд өчигдөр 42 настай эрэгтэй хоёр тарвага худалдаж аваад өвчсөний улмаас тарваган тахлын булчирхайн хэлбэр болох үжлээр хүндэрч нас барсан талаар бид мэдээлсэн билээ.
Ховд аймгийн засаг даргын тамгын газраас тус иргэний нян илрүүлэх шинжилгээний хариу албан ёсоор гараагүй, лабораторийн шинжилгээ хийгдэж байгаа ба нэг болон хоёрдугаар хавьтагч нарыг илрүүлж, нэгдүгээр хавьтагч нарыг тусгаарлах болон бусад холбогдох арга хэмжээг шуурхай авч ажиллахыг мэргэжлийн байгууллагуудад үүрэг болгосон гэв.
Үүний дагуу нэгдүгээр хавьтлын 73 хүнийг тусгаарлаж, урьдчилан сэргийлэх эмчилгээнд хамруулж буй бөгөөд тусгаарлагдсан иргэдийн биеийн байдал хэвийн, эмнэлзүйн шинж тэмдэг илрээгүй байгаа аж. Мөн Ховд аймгийн Онцгой комисс дахин хуралдаж, сэжигтэй тохиолдлын нэгдүгээр хавьтлын хүмүүсийг дахин хянаж тогтоох, Жаргалант суман дахь постуудын хяналт шалгалтыг улам чангатгаж ажиллахыг холбогдох албанынханд үүрэг болгов.
Ард иргэд та бүхнийг гоц халдварт тарваган тахал өвчнөөс урьдчилан сэргийлэх зорилгоор тарвага агнахгүй, түүхий эд бүтээгдэхүүнийг нь хэрэглэхгүй, зөөвөрлөн, тээвэрлэж худалдаалахгүй байхыг онцгойлон анхааруулж байна.
