Шинээр томилогдсон Ерөнхий сайд Засгийн газрын бүтэц, бүрэлдэхүүний талаар байр сууриа илэрхийллээ. Тэрбээр газрын тосны бүтээгдэхүүний үнэ өссөн, хариуцлагатай цаг үед үүрэгт ажилдаа орж байгаагаа онцлоод, Засгийн газрын үйл ажиллагааг тасалдуулахгүйгээр шуурхай үргэлжлүүлэх шаардлагатай байгааг хэлэв.
Өнөөдрийн байдлаар яамдын Төрийн нарийн бичгийн дарга болон төрийн албан хаагчидтай хамтран ажиллаж, Засгийн газрын хэвийн үйл ажиллагааг хангаж байгаа аж. Мөн УИХ-ын Аюулгүй байдлын байнгын хороонд агаарын хөлгийн түлш болон гаалийн импортын татвартай холбоотой хуулийн төслүүдийг нэн яаралтай горимоор хэлэлцүүлэхээр өргөн мэдүүлсэн байна.
Олон улсын нөхцөл байдалтай холбоотойгоор ОХУ-тай хийх гэрээ, хэлэлцээрүүд хүлээгдэж буй тул зарим сайдыг улируулан томилох шаардлага үүссэнийг тэрбээр дурдсан юм. Энэ хүрээнд салбарын сайд нарын гүйцэтгэл, өмнө нь тогтоосон олон улсын харилцааг харгалзан үзэж байгаа аж.
Түүнчлэн бүхнийг шинээр эхлүүлэх цаг хугацаа байхгүйг онцолж, яам бүрийн гүйцэтгэлийн тайлантай танилцсан гэв. Төсвийн хүрээний мэдэгдлийг тавдугаар сарын 1-ний дотор өргөн барих хуулийн хугацаа тулсан тул төсөв, төлөвлөгөөний ажлууд шахуу хуваарьтай үргэлжилж байгаа юм.
Харин Засгийн газрын бүтцэд өөрчлөлт оруулах, тухайлбал хоёр яамыг нэгтгэх тохиолдолд улсын төсөвт тодотгол хийх шаардлага үүсэхийг анхаарууллаа. Тэрбээр, “Сар бүр төсөв тодотгох нөхцөл үүсэх эрсдэлтэй байна” хэмээн онцолсон юм.
Шинэ Ерөнхий сайд томилогдсоноор өмнөх Засгийн газар бүрэн бүрэлдэхүүнээрээ огцордог Үндсэн хуулийн зохицуулалттай тул одоогоор Засгийн газар бүрэн бүрдээгүй байгаа аж. Иймээс холбогдох хуулийн төслүүдийг өөрөө танилцуулж байгаагаа хэлээд, Засгийн газрын бүтэц, бүрэлдэхүүнийг ойрын хугацаанд шийдвэрлэхээ мэдэгдлээ.
Мөн бүх сайдыг нэг дор солих боломжгүйг тодотгож, ялангуяа олон улсын гэрээ, хэлэлцээр хүлээгдэж буй салбаруудад залгамж чанарыг хадгалах шаардлагатайг онцолсон юм. Түлшний асуудал нэн тулгамдсан хэвээр байгааг дурдав.
Засгийн газрын бүтэц, бүрэлдэхүүнд өөрчлөлт оруулах нь зөвхөн улс төрийн шийдвэрээс гадна санхүүгийн дарамт үүсгэдэг. Яамдын бүтэц өөрчлөгдвөл халаа, сэлгээ, зардал нэмэгдэхээс гадна зарим сул орон тоог цомхотгож, хэмнэлт гаргах бодлого баримталж байгааг тэрбээр хэллээ.
Мөн тавдугаар сарын 31-ний дотор зарлагдаагүй тендерүүдийг цуцалж, хөрөнгө оруулалтын зардлыг танахаар төлөвлөж буй аж. Орлого тасарсан тохиолдолд улсын төсөвт тодотгол хийхээс өөр аргагүй нөхцөл үүсэхийг дахин сануулсан байна.
Туулын хурдны замын төслийн талаар асуухад, ажлын хэсэг байгуулж судлуулахаа мэдэгдэв.
Харин улс төрийн хамтын ажиллагааны хүрээнд одоогоор ХҮН намд хамтрах санал тавьсан бөгөөд АН-тай хамтрах эсэхийг намын Удирдах зөвлөлөөр хэлэлцүүлэхээр төлөвлөжээ.
Түүнчлэн хотын удирдлагуудтай холбоотой ёс зүйн асуудлыг Ёс зүйн хороогоор хэлэлцүүлэх бөгөөд хотын даргад албан ёсоор анхааруулга өгсөн гэдгийг онцоллоо.
Сэтгэгдэл бичих