NASA-гийн “Artemis II” хөтөлбөрийн хүрээнд Сар луу жолоодлогот сансрын хөлөг хөөргөхөд үлдсэн 50 цагийн тооллыг эхлүүлсэн талаар хөөргөх ажиллагааг хариуцсан захирал Чарли Блэквелл-Томпсон мэдэгдлээ.
Тэрбээр NASA-д болсон хэвлэлийн хурлын үеэр “Хөөргөх ажиллагааны тооллыг албан ёсоор эхлүүлснийг дуулгахад таатай байна. Манай баг энэ мөчид хүрэхийн тулд маш их хөдөлмөрлөсөн. Бүх үзүүлэлт биднийг бүрэн, бүр төгс бэлэн байгааг харуулж байна” хэмээн онцолсон байна.
“Artemis II” хөтөлбөрийн хүрээнд ашиглах “Space Launch System” (SLS) зөөгч пуужин болон “Orion” сансрын хөлгийг гуравдугаар сарын 20-нд Кеннедийн нэрэмжит Сансрын төв-ийн 39A хөөргөх талбайд байрлуулжээ.
Сансрын хөлгийг АНУ-ын Зүүн эргийн цагаар дөрөвдүгээр сарын 1-ний 18:24 цагт хөөргөхөөр төлөвлөсөн бөгөөд тухайн үед цаг агаар тохиромжтой байх магадлал 80 хувьтай байна.
Энэхүү нислэгийн үеэр “Orion” хөлөг Сарыг нэг бүтэн тойрон нисэх бөгөөд нийт 10 хоног үргэлжилнэ. Багийн бүрэлдэхүүнд NASA-гийн сансрын нисэгчид Рейд Уайзман, Виктор Гловер, Кристина Кох болон Канадын сансрын агентлаг-ийн нисэгч Жереми Хансен нар багтжээ. Тэд Сарнаас хэдэн арван мянган км зайд ниссэний дараа Номхон далайд буцан газардахаар төлөвлөсөн байна.
Өмнө нь “Artemis I” хөтөлбөрийн хүрээнд “Orion” хөлгийг тээсэн SLS пуужинг 2022 оны 11 дүгээр сард жолоодлогогүйгээр амжилттай хөөргөсөн юм.
Сэтгэгдэл бичих