Улсын Их Хурал-ын чуулганы нэгдсэн хуралдаанаар УИХ-ын дарга Н.Учрал-ыг үүрэгт ажлаас нь чөлөөлөх асуудлыг хэлэлцэн шийдвэрлэлээ.
Өмнө нь УИХ-ын Төрийн байгуулалтын байнгын хорооны хуралдаанаар уг асуудлыг хэлэлцэж, гишүүдийн 85 хувийн саналаар дэмжсэн байна. Харин чуулганы нэгдсэн хуралдаанаар санал хураалт явуулахад 80.2 хувийн саналаар Н.Учралыг УИХ-ын даргын албан тушаалаас чөлөөллөө.
Хэлэлцүүлгийн үеэр гишүүд байр сууриа илэрхийлж, асуулт асууж, хариулт авсан юм.
УИХ-ын гишүүн Б.Пүрэвдорж парламент туршлага, шат дараалалд тулгуурлан ажиллах ёстойг онцолж, “Парламент бол ахмад, дунд, залуу үеийн тэнцвэртэй оролцоонд тулгуурладаг байгууллага. Иймд цаашид туршлагатай, тогтвортой хүнийг УИХ-ын даргаар сонгох нь зүйтэй” хэмээн хэллээ.
Харин УИХ-ын гишүүн Х.Тэмүүжин парламентын бие даасан байдлыг онцолж, “Парламент улс төрийн намын дотоод нөлөөллөөс ангид байх ёстой. Дараагийн УИХ-ын даргыг Монгол Улсын Үндсэн хууль-ийн үзэл баримтлалд нийцүүлэн сонгох шаардлагатай” гэв.
Харин УИХ-ын дарга Н.Учрал “Богино хугацаанд ажилласан ч үр бүтээлтэй ажилласан гэж үзэж байна. Парламентын бүх нам, гишүүдэд тэгш хандаж, чөлөөт мэтгэлцээний орчныг бүрдүүлэхийг зорьсон” хэмээн байр сууриа илэрхийллээ.
Ингэснээр УИХ-ын даргын албан тушаал сул болж, дараагийн спикерийг сонгох асуудал улс төрийн анхаарлын төвд шилжиж байна.
УИХ-ын чуулганы нэгдсэн хуралдаан 14:00 цагт үргэлжлэх юм.
Сэтгэгдэл бичих