Улсын Их Хурал-ын Төрийн байгуулалтын байнгын хорооны өнөөдрийн хуралдаанаар УИХ-ын даргыг чөлөөлөх асуудлыг хэлэлцлээ.
Хуралдааны эхэнд УИХ-ын дарга Н.Учрал үүрэгт ажлаас чөлөөлөгдөх хүсэлтээ танилцуулсан юм. Тэрбээр, “Монгол Ардын Нам-ын Бага хурлаас намайг Ерөнхий сайдад нэр дэвшүүлэх улс төрийн шийдвэр гаргасан. Иймд төрийн тогтвортой байдлыг хангах, парламентын дархлааг хадгалах, улс орны эрх ашгийг нэн тэргүүнд тавих үүднээс УИХ-ын даргын үүрэгт ажлаас чөлөөлөгдөх хүсэлтээ гаргаж байна” хэмээн онцоллоо.
Хэлэлцэж буй асуудалтай холбогдуулан санал хураалт явуулахад хуралдаанд оролцсон 20 гишүүн санал нэгтэйгээр дэмжсэн байна. Улмаар тус байнгын хорооны шийдвэрийг УИХ-ын чуулганы нэгдсэн хуралдаанд танилцуулахаар болжээ.
Мөн УИХ-ын даргыг шинээр сонгох хүртэл хугацаанд УИХ-ын дэд дарга Ж.Бат-Эрдэнэ парламентын үйл ажиллагааг ахлан ажиллахаар шийдвэрлэсэн байна.
Сэтгэгдэл бичих