Ираны Дээд удирдагч Али Хаменеи амиа алдсантай холбогдуулан тус улсыг түр хугацаанд гурван хүний бүрэлдэхүүнтэй зөвлөл удирдахаар болсон тухай Ираны төрийн хэвлэлүүд мэдээллээ.
Мэдээлэлд дурдсанаар, уг зөвлөлд Ираны Ерөнхийлөгч Масуд Пезешкиан, шүүх засаглалын тэргүүн Голямхосейн Мохсени Эйе болон Үндсэн хуулийн хэрэгжилтэд хяналт тавьдаг Хамгаалагчдын зөвлөлийн гишүүдийн нэг төлөөлөгч багтах ажээ. Тэд шинэ Дээд удирдагчийг томилох хүртэл улс орныг түр хугацаанд удирдах юм.
Ираны Үндсэн хуулийн дагуу Дээд удирдагчийг сонгох эрх бүхий байгууллага нь 88 шашны зүтгэлтнээс бүрддэг Сэцдийн зөвлөл бөгөөд уг зөвлөл шинэ удирдагчийг аль болох богино хугацаанд сонгох үүрэгтэй байна. Одоогоор Али Хаменеи аятоллагийн залгамжлагч хэн байх нь тодорхой болоогүй байгаа юм.
Ираны төрийн телевизийн мэдээлснээр Али Хаменеи хоёрдугаар сарын 28-нд АНУ болон Израилын хамтарсан агаарын цохилтын үеэр амиа алдсан гэж мэдэгдсэн бөгөөд үүнтэй холбогдуулан тус улсад 40 хоногийн гашуудал зарлажээ.
Ажиглагчдын үзэж байгаагаар Ираны дээд удирдлагад гарсан энэхүү өөрчлөлт нь Ойрхи Дорнодын бүс нутгийн аюулгүй байдлын нөхцөл байдалд томоохон нөлөө үзүүлж болзошгүй бөгөөд АНУ–Израил–Ираны зөрчил цаашид хэрхэн өрнөх нь олон улсын анхаарлын төвд байна.
Сэтгэгдэл бичих