АНУ Ираны эсрэг явуулж буй цэргийн ажиллагаагаа зорилгодоо бүрэн хүрэх хүртэл үргэлжлүүлэхээ мэдэгдлээ. Энэ тухай АНУ-ын Ерөнхийлөгч Дональд Трамп мэдэгдэж, сүүлийн өдрүүдэд өрнөж буй байлдааны ажиллагаа бүрэн хэмжээнд үргэлжилж байгааг онцлон тэмдэглэв.
Түүний мэдээлснээр АНУ холбоотнуудтайгаа хамтран сүүлийн 36 цагийн хугацаанд “Баатарлаг хилэн” нэртэй өргөн цар хүрээтэй цэргийн ажиллагааг эхлүүлсэн байна. Ерөнхийлөгч Д.Трамп Truth Social нийгмийн сүлжээнд нийтэлсэн дүрс бичлэгтээ уг ажиллагааг дэлхий дахин өмнө нь харж байгаагүй хамгийн том бөгөөд нарийн төвөгтэй довтолгооны ажиллагааны нэг хэмээн тодорхойлжээ.
Тэрбээр мэдэгдэлдээ АНУ болон холбоотнууд Ираны Исламын хувьсгалыг хамгаалагчдын корпусын дэд бүтэц, агаарын довтолгооноос хамгаалах систем болон олон зуун цэргийн объектод цохилт өгсөн гэж дурдсан байна. Мөн есөн байлдааны хөлөг онгоц болон тэнгисийн цэргийн баазуудыг богино хугацаанд устгасан гэж мэдэгджээ.
Ерөнхийлөгч Д.Трамп мэдэгдэлдээ Ираны Дээд удирдагч Али Хаменеи амиа алдсан талаар дахин дурдсан боловч уг мэдээллийг Ираны албан ёсны эх сурвалжууд хараахан батлаагүй байна. Харин Ираны зарим хэвлэл мэдээллийн хэрэгслээр Аятолла Арафиг Дээд удирдагчийн үүргийг түр орлон гүйцэтгэгчээр томилсон тухай мэдээлжээ.
АНУ-ын Ерөнхийлөгчийн хэлснээр байлдааны ажиллагаа одоогоор бүрэн үргэлжилж байгаа бөгөөд стратегийн зорилтуудыг хэрэгжүүлж дуусах хүртэл зогсоохгүй гэлээ.
Нөхцөл байдал хурцадсантай холбогдуулан Европын Холбооны гишүүн орнуудын Гадаад хэргийн сайд нар яаралтай хуралдахаар болсон байна. Үүний зэрэгцээ Пакистаны Карачи хот дахь АНУ-ын Консулын газар руу халдсан халдлагын үеэр найман хүн амиа алдсан тухай олон улсын хэвлэлүүд мэдээлжээ.
Ойрхи Дорнодын бүс нутагт хурцадмал байдал нэмэгдэж, АНУ–Ираны зөрчил илүү өргөн хүрээний мөргөлдөөнд хүрч болзошгүй талаар ажиглагчид анхааруулж байна.
Сэтгэгдэл бичих