“Нүүрсний хэрэг”-т холбогдон ял шийтгүүлсэн УИХ-ын гишүүн асан Т.Аюурсайхан өчигдөр буюу 2026 оны хоёрдугаар сарын 28-нд хорих ангиас суллагдсаныхаа дараа цахим хуудсаараа дамжуулан мэдэгдэл хийжээ.
Түүнийг анхан шатны шүүхээс гурван жилийн хорих ял оноосон бол давж заалдах шатны шүүхээс ялын хэмжээг 2 жил 6 сар болгон бууруулсан юм.
Т.Аюурсайхан мэдэгдэлдээ өөрийг нь “нүүрсний хэрэг”-т хилсээр холбогдуулан ялласан гэж үзэж байгаагаа илэрхийлж, тухайн үеийн Ерөнхий сайд Л.Оюун-Эрдэнэ-ийг улс төрийн захиалгатай хэрэг үүсгэсэн хэмээн буруутгав.
Тэрбээр “Өнөөдөр эрх чөлөөтэй үгээ хэлэх боломжтой болов. Л.Оюун-Эрдэнэ захиалж намайг хилсээр нүүрсний хэрэгт холбогдуулж яллуулсан. Миний эсрэг Ардын намын томоохон бүлэглэл ажилласан” хэмээн мэдэгдсэн байна.
Мөн өөрийнх нь хэрэгт нүүрстэй холбоотой үйл баримт шүүхээр хэлэлцэгдээгүй гэж үзэж байгаагаа илэрхийлж, Нийслэлийн Эрүүгийн хэргийн давж заалдах шатны шүүхийн шүүгч Б.Ариунхишиг 2024 оны есдүгээр сарын 12-нд өгсөн тайлбарыг дурдсан байна. Тэрбээр олон нийтэд өөрийг нь нүүрсний хэрэгт ял шийтгүүлсэн мэтээр мэдээлж байгаа нь гүтгэлэг гэж мэдэгдсэн юм.
Т.Аюурсайхан мөн өөрийн өмч хөрөнгийг олон жилийн турш шалгуулж, хууль ёсны эх үүсвэртэй гэдгийг баримтаар нотолсон хэмээн тайлбарлаж, удахгүй энэ талаар дэлгэрэнгүй мэдээлэл өгөхөө илэрхийлжээ.
Тэрбээр улс төрийн үйл ажиллагааныхаа хүрээнд стратегийн ордуудыг хувьчлах оролдлогыг эсэргүүцэж, баялгийн үр өгөөжийг ард иргэдэд хүртээх бодлогыг дэмжиж ирсэн гэж мэдэгдсэн байна. Мөн цаашид авлигын эсрэг тэмцэлд дэмжлэг үзүүлж ажиллана гэдгээ илэрхийлжээ.
Т.Аюурсайхан нь нүүрсний хэрэгтэй холбогдуулан шалгагдсан улс төрчдийн нэг бөгөөд түүний холбогдсон хэргийг шүүхээр шийдвэрлэсний дараа ийнхүү суллагдаж, анхны байр сууриа илэрхийлээд байна.
Эх сурвалж: Т.Аюурсайханы цахим хуудас (2026.02.28)
Сэтгэгдэл бичих