Монгол Ардын Намын Бага хурлын хоёрдугаар хуралдаан өнөөдөр 10:00 цагт Тусгаар тогтнолын ордонд эхлэхээр товлогджээ. Энэ удаагийн хуралдаанаар намын дотоод зохион байгуулалт болон ойрын хугацаанд хэрэгжүүлэх бодлогын асуудлуудыг хэлэлцэхээр төлөвлөсөн байна.
Хуралдаанаар Монгол Ардын Нам үүсэн байгуулагдсаны 105 жилийн ойн арга хэмжээний зохион байгуулалтын асуудлыг голлон хэлэлцэх бөгөөд УИХ-ын дарга, МАН-ын дарга Н.Учрал, намын Ерөнхий нарийн бичгийн дарга Я.Содбаатар, Ерөнхий сайд Г.Занданшатар нар илтгэл тавихаар төлөвлөжээ.
Мөн албан бус эх сурвалжийн мэдээллээр тус хуралдаанаар 2024 оны УИХ-ын сонгуульд дэвшүүлсэн мөрийн хөтөлбөрийн хэрэгжилт болон Засгийн газрын үйл ажиллагааны явцыг хэлэлцэж магадгүй байна.
Сануулахад, 2025 оны арваннэгдүгээр сард болсон Монгол Ардын Намын 31 дүгээр Их хурлаар Бага хурлын бүтцийг шинэчилж, гишүүдийн тоог 479-өөс 597 болгон нэмэгдүүлсэн юм. Ингэснээр намын бодлого, шийдвэр гаргах хүрээ өргөжсөн гэж үздэг.
Сэтгэгдэл бичих