УИХ-ын гишүүн асан, МАН-ын бүлгийн даргаар ажиллаж байсан, өдгөө Монголросцветмет ТӨҮГ-ын захирлын үүрэг гүйцэтгэж буй Д.Тогтохсүрэнд холбогдох хэрэгт мөрдөн шалгах ажиллагаа үргэлжилж байна.
Түүний албан өрөөнд энэ сарын 3-ны өдөр Авлигатай тэмцэх газар (АТГ)-ын мөрдөгчид прокурорын зөвшөөрлөөр хойшлуулшгүй ажиллагааны хүрээнд нэгжлэг хийж, 48 цагийн хугацаанд саатуулсан талаар өмнө нь мэдээлэгдсэн. Түүнийг Эрүүгийн хуулийн 22 дугаар бүлэгт заасан авлига, албан тушаалын гэмт хэрэгт холбогдуулан шалгаж байгаа юм.
Зарим эх сурвалжийн мэдээлснээр, Д.Тогтохсүрэнг гадаадын иргэдээс онц их хэмжээний хахууль авсан байж болзошгүй асуудлаар нэмж шалгаж эхэлсэн гэх мэдээлэл ч гараад байна. Гэхдээ албан ёсны байгууллагаас энэ талаар дэлгэрэнгүй тайлбар хийгээгүй байна.
Тэгвэл дүүргийн эрүү, иргэний хэргийн хялбар ажиллагааны анхан шатны тойргийн шүүхийн ерөнхий шүүгч Б.Халиун яллагдагчийн эрүүл мэндийн байдлыг харгалзан, түүнийг цагдан хорих таслан сэргийлэх арга хэмжээг өөрчилж суллах захирамж гаргажээ.
Шүүхийн шийдвэрийн дагуу:
-
Хилээр гарахыг хязгаарлах,
-
Хэргийн бусад оролцогчидтой уулзах, харилцах, холбоо тогтоохыг хориглох,
-
Мөрдөн шалгах ажиллагаанд саад учруулахгүй байх зэрэг хязгаарлалтыг тогтоосон байна.
Хэргийг шалгах ажиллагаа үргэлжилж байгаа бөгөөд эцсийн шийдвэр гараагүй байна. Хууль хяналтын байгууллагаас хэргийн талаар албан ёсны нэмэлт мэдээлэл өгөөгүй бөгөөд мөрдөн шалгах ажиллагааны явцад нотлох баримтыг нарийвчлан шалгаж байгаа аж.
Сэтгэгдэл бичих