МИЛАН, 2026 оны хоёрдугаар сарын 17. /ТАСС/. Уран гулгагч Анастасия Метелкина, Лука Берулава нар Милан-Кортинагийн Олимпын наадмын хосын төрөлд хоёрдугаар байрт шалгарснаар Гүржийн тамирчид өвлийн Олимпын түүхэнд анхныхаа медалийг хүртлээ.
Богино ба чөлөөт үзүүлбэрүүдийн нийлбэр дүнгээр Метелкина, Берулава нар 221,75 оноо авч мөнгөн медаль хүртсэн бол Японы уран гулгагч Рику Миура, Рюити Кихара нар 231,24 оноогоор Олимпын аварга болсон байна. Тэд мөн чөлөөт үзүүлбэрээр 158,13 оноо авч дэлхийн дээд амжилтыг шинэчлэн тогтоожээ. Хүрэл медалийг Германы тамирчин Минерва Фабьен Хазе, Никита Володин (219,09 оноо) хүртсэн байна.
20 настай Метелкина, 23 настай Берулава нар 2026 оны Европын аварга, 2024 оны ЕАШТ-ий мөнгө, 2025 оны ЕАШТ-ий хүрэл медальтнууд юм. Владимир хотод төрсөн Метелкина 2020 оноос хойш Гүржийн шигшээ багийн бүрэлдэхүүнд тэмцээн уралдаанд оролцож байна.
Харин Москва хотын уугуул Берулава Оросын дасгалжуулагч Павел Слюсаренко, Егор Закроев нарын удирдлага дор дасгал сургуулилалтаа хийдэг юм.
Сэтгэгдэл бичих