УИХ-ын гишүүн, Засгийн газрын Xэрэг эрхлэх газрын дарга С.Бямбацогт энэ сарын 11-ний өдөр Говь-Алтай аймагт ажиллав. Тэрбээр Алтай хотын иргэд сонгогчидтой уулзах үеэр төрийн бодлого шийдвэр, цаашид хэрэгжүүлэх арга хэмжээний талаар танилцуулж, иргэдийн санал хүсэлтийг сонсов. Иргэд, хүүхэд залуус цахим мөрийтэй тоглоомд донтож байгаа, татварын дарамтыг бууруулах, малын гаралтай түүхий эдийг боловсруулж үнэд хүргэх, бичил уурхай эрхлэгчдийн эрх ашгийг хамгаалах зэрэг асуудалд анхаарал хандуулж ажиллахыг хүссэн.
Говь-Алтай аймаг 2026 онд хүний хөгжлөөр улсдаа манлайлах зорилт тавьж эрүүл мэнд, боловсрол, өрхийн орлогод анхаарч ажиллаж байна. Түүнчлэн ЭЕШ-д 650-аас дээш оноо авсан хүүхдүүдэд урамшуулал олгодог сайн жишиг тогтжээ.
С.Бямбацогт аймгийн удирдлагуудтай уулзан цаг үеийн байдлын талаар мэдээлэл сонсон, өвлийг өнтэй давж, урин хавартаа золгоход анхаарч ажиллахыг хүсээд Улсын онцгой комиссын нөөцөөс 650 тн тэжээл, 50 тн шатахууны дэмжлэгийг хүлээлгэн өгч, Хөхморьт суманд туулах чадвартай Lexus-570 машин гардуулсан юм.
Зам дагаад хөгжил гэдэг. Энэ жил Говь-Алтай-Улиастай чиглэлийн хатуу хучилттай авто замын ажил эхэлж, Говь-Алтай-Бургастай чиглэлийн 253 км авто замын зураг төсөл хийгджээ. Дээрх чиглэлийн замууд баригдсанаар Говь-Алтай аймагт Ази Европ, урд хойд хөршийг холбосон Монгол Улсын авто замын 3 дахь коридор бий болно.
Сэтгэгдэл бичих